लोणावळा : पुणे आणि रायगड जिल्ह्याच्या सीमेवर दोन्ही जिल्ह्यांचे प्रवेशद्वार म्हणून संबोधला जाणारा खंडाळा घाटातील १८९ वर्षे जुना ऐतिहासिक ब्रिटिशकालीन 'अमृतांजन पूल' पाडण्याच्या कामाला चार एप्रिलपासून सुरुवात होणार आहे. 'एक्स्प्रेस वे'वर सातत्याने होणारे अपघात आणि वाहतूक कोंडीच्या पार्श्वभूमीवर हा पूल पडण्याचा निर्णय सरकार, पुरातत्त्व विभाग व रस्ते विकास महामंडळाने घेतला आहे.
कोकण आणि घाटमाथ्यावरील मावळ, लोणावळा आणि पुण्याला दळणवळणाची सोय व्हावी म्हणून ब्रिटिशांनी पुणे आणि रायगड जिल्ह्याची सीमा असलेल्या खंडाळा घाटमाथ्यावर हा पूल बांधला होता. येत्या ४ ते १४ एप्रिल या कालवधीत पूल पाडण्याचे काम सुरू राहणार असून, या दरम्यान मुंबईहून पुण्याकडे जाणारी वाहतूक किलोमीटर क्रमांक ४४ अंडा पॉइंट येथून जुन्या मार्गाने लोणावळ्यातून लोणावळा एक्झिट येथून पुन्हा 'एक्स्प्रेस वे'वर वळविण्यात येणार आहे.
---