बलात्काराच्या गुन्ह्यातून जामीनावर सुटलेल्या सावत्र बापाकडून धाकट्या मुलीवर अत्याचार

म. टा. प्रतिनिधी, पिंपरीः सावत्र मोठ्या मुलीवर बलात्कार केल्याने शिक्षा भोगताना तात्पुरती सुटका झाल्यावर घरी येऊन बापाने अकरा वर्षांच्या लहान मुलीवर बलात्कार केल्याचा धक्कादायक प्रकार उघडकीस आला आहे. देहूरोड पोलिस ठाण्यात याप्रकरणी गुन्हा दाखल करून बापाला अटक करण्यात आली आहे.

वरिष्ठ निरीक्षक मनिष कल्याणकर यांनी दिलेल्या माहितीनुसार, रोजंदारीवर काम करणारे हे कुटुंब आहे. पीडित मुलीला तिची आई दवाखान्यात घेऊन गेली होती. त्यानंतर डॉक्टरांना ही बाब लक्षात येताच त्यांनी पोलिसांना घटनेची माहिती दिली. त्याचबरोबर देहूरोड येथील डॉक्टरांनी याप्रकरणात स्वतः फिर्याद दिली आहे.

वाचाः सेंट जॉर्ज रुग्णालयातील अंध कर्मचाऱ्यांना मुख्यमंत्र्यांनी दिली शाबासकी

चार वर्षांपूर्वी हडपसर परिसरात राहत असताना १४ वर्षांच्या (तेव्हा अकरा वय) मुलीवर याच आरोपी बापाने बलात्कार केला होता. त्यामुळे त्याला अटक करून, त्याची रवानगी कारागृहात करण्यात आली होती. त्यानंतर पीडितेची आई दोन्ही मुलींना घेऊन मिळेल तिकडे काम करीत होती. काही दिवस ती तळेगाव परिसरात राहत होती. तेथून महिन्याभरापूर्वीच देहूरोड परिसरात राहण्यासाठी आली. दरम्यान, नराधम बाप काही दिवसांपूर्वी कारागृहातून सुटला आहे. तो पुन्हा या कुटुंबाच्या संपर्कात आला. त्याने घरी आल्यावर अकरा वर्षांच्या मुलीवर बलात्कार केला. मुलीच्या आईला ही बाब समजल्यावर तिने मुलीला घेऊन दवाखाना गाठला. तेथील डॉक्टरांना घडलेली माहिती सांगितली. डॉक्टरांनी वैद्यकीय तपासणी करताच तत्काळ ही बाब देहूरोड पोलिस ठाण्याच्या वरिष्ठ अधिकाऱ्यांना कळविली. पोलिसांनी प्रथम नराधम बापाला अटक केली. त्यानंतर गुन्हा दाखल करण्याची प्रक्रिया केली. देहूरोड पोलिस तपास करीत आहेत.

वाचाः राज्यात २४८ करोनाबळी; मुंबई, सोलापूरात सर्वाधिक मृत्यूंची नोंद