२७ सप्टेंबर
शुक्रवार
जॉ-मार्क यांच्या छायिचित्रांचे प्रदर्शन
ऑलिऑन्स फ्रान्सेज दी पुणे यांच्यातर्फे फ्रेंच छायाचित्रकार जॉ-मार्क यांनी काढलेल्या छायाचित्रांचे प्रदर्शन १ ऑक्टोबरपर्यंत पाहता येणार आहे. जॉ-मार्क हे कलात्मक छायाचित्रकार आहेत. त्यांच्या छायाचित्रणामुळे अनेकांना लिहिण्याची प्रेरणा मिळाली आहे. छायाचित्रांचे प्रदर्शन अनेक देशांत भरविण्यात आले आहे.
दर्पण कला दालन, पत्रकार नगर : स. ११ ते सायं. ७.३०
महाजन यांच्याविषयी कार्यक्रम
लेखिका कविता महाजन यांच्या पहिल्या स्मृतिदिनानिमित्त मैत्री साहित्य गटातर्फे महाजन यांच्या साहित्यिक कार्यकर्तृत्वाचा आढावा घेणारा कार्यक्रम आयोजित करण्यात आला आहे. कार्यक्रमाची संहिता उज्ज्वला मेहेंदळे यांनी लिहिली असून, माजी न्यायमूर्ती मृदुला भाटकर आणि ज्येष्ठ अभिनेत्री सुषमा देशपांडे अभिवाचन करणार आहेत.
एस. एम. जोशी सभागृह, नवी पेठ : सायं. ५.३०
'न ऐकलेले गदिमा'
साहित्यरंग वाङ्मय मंडळातर्फे 'न ऐकलेले गदिमा' हा कार्यक्रम आयोजित करण्यात आला आहे. नंदिनी सातारकर, राजेंद्र देशपांडे, सुहास सिंदगीकर, भारती वाळुंज हे कलाकार सहभागी होणार आहेत.
श्री गणेश ध्यानमंदिर, श्रीराम सोसायटी, वारजे : सायं. ५.३०
उपशास्त्रीय रचनांची मैफल
भारतीय विद्या भवन आणि इन्फोसिस फाउंडेशन यांच्यातर्फे 'अनुबंध' हा कार्यक्रम आयोजित करण्यात आला आहे. कजरी, चैती, होरी अशा उपशास्त्रीय रचना मैफलीत सादर होणार आहेत. अनुराधा पटवर्धन, केदार तळणीकर, नीलिमा राडकर, कुमार करंदीकर, रंजना काळे हे कलाकार सहभागी होणार आहेत.
सरदार महादेव बळवंत नातू सभागृह, भारतीय विद्या भवन, सेनापती बापट रस्ता : सायं. ६
चित्रकला प्रदर्शनाचे आयोजन
भारतीय कला, संस्कृती, परंपरा या विषयावर ढेपेवाड्यातर्फे चित्रकला स्पर्धा आणि प्रदर्शन आयोजित करण्यात आले आहे. हे प्रदर्शन ३० सप्टेंबरपर्यंत पाहता येईल. भारतीय सण, पारंपरिक खेळ, वेशभूषा, दागिने, वास्तुरचना शास्त्र, नृत्य प्रकार, भारतीय संगीत आणि वाद्ये, ग्रामीण भागातील घरे व निसर्ग या विषयावरील चित्रे यात पाहता येतील.
बालगंधर्व कलादालन, जंगली महाराज रस्ता : सायं. ६
नृत्यगंगा सादरीकरण
रूपक कलासदन संस्थेतर्फे भरतनाट्यम् शैलींमधील 'नृत्यगंगा' हे सादरीकरण होणार आहे. मानसी वझे यांच्या शिष्या कला सादर करणार आहेत. नृत्यगुरू डॉ. सुचेता भिडे-चापेकर यांची उपस्थिती असेल.
बालशिक्षण सभागृह, मयूर कॉलनी, कोथरूड : सायं. ६.३०
बँडवादन
मूळचा लॉस एंजलिस येथील आणि सध्या मुंबईस्थित असणारा गिटार प्लेअर 'एसी' याच्या बँडचे वादन ऐकता येणार आहे. जॅझ आणि फ्युजन संगीताचा मिलाफ असणारा हा कार्यक्रम संगीत रसिकांसाठी पर्वणी असेल. एसीच्या गिटार वादनाला मुंबईच्याच अॅरॉन नियरोच्या ड्रम्सची आणि अविषेक डेच्या बासची साथ मिळणार आहे.
बाबोआब साउंड स्टेज, राजा बहादूर सिटी सेंटर, संगमवाडी : रा. ८