चर्चा तर होणारच
म. टा. प्रतिनिधी, पिंपरी
राष्ट्रवादी काँग्रेसचे नेते अजित पवार यांच्या बंडाच्या पाठीशी खंबीरपणे उभे राहणारे राष्ट्रवादी काँग्रेसचे पिंपरीचे आमदार अण्णा बनसोडे विधानभवनात शपथ घेताना दिसले. पिंपरी-चिंचवडमधील राष्ट्रवादी काँग्रेसच्या शिष्टमंडळाने पक्षाचे सर्वेसर्वा शरद पवार यांची भेट घेतली. त्यांच्यासमवेत बनसोडे मात्र 'साहेबां'समोर आले नाहीत. ते अजित पवार यांच्यासमवेतच राहिले.
माजी उपमुख्यमंत्री अजित पवार यांच्या बंडाला पाठिंबा देणारे आमदार अण्णा बनसोडे गेल्या दोन दिवसांपासून 'नॉट रिचेबल' होते. त्यामुळे राष्ट्रवादी काँग्रेसचे पिंपरी-चिंचवडमधील पदाधिकारी संभ्रमावस्थेत होते. 'गेले अण्णा कुणीकडे?' म्हणत त्यांचा शोध चालू होता. मंगळवारी (२६ नोव्हेंबर) अजित पवार यांनी उपमुख्यमंत्रिपदाचा राजीनामा दिला. त्यानंतर राजकीय घडामोडींना वेग आला. महाविकास आघाडीची स्थापना झाली. त्यानंतर रात्री अजित पवार यांनी पक्षाचे सर्वेसर्वा शरद पवार यांची भेट घेतली. मात्र, या सर्व घडामोडींमध्ये बनसोडे यांचे कुठेच दिसत नव्हते. ते गेले तरी कुठे? दादांनी त्यांना कुठे ठेवले? याविषयीच्या तर्कवितर्कांना उधाण आले होते.
विधानभवनात सकाळी शपथविधी सोहळा झाला. या सोहळ्याला उपस्थित राहण्यासाठी अजित पवार यांचे प्रवेशद्वारावर आगमन झाले. त्यांचे स्वागत खासदार सुप्रिया सुळे यांनी केले. याच वेळी अजित पवार यांच्यासमवेत अण्णा बनसोडे यांचेही 'दर्शन' झाले. त्यामुळे शहरातील पदाधिकाऱ्यांनाही दिलासा मिळाला. शपथविधी घेतल्यानंतर बनसोडेंनी 'जय हिंद, जय महाराष्ट्र' अशी घोषणा दिली. त्या वेळी केवळ ७८ तासांचे उपमुख्यमंत्री राहिलेल्या अजित पवारांचे खंदे समर्थक म्हणून अण्णा बनसोडे यांची ओळख मात्र अनेकांच्या स्मरणात राहणारी ठरली.
राष्ट्रवादी काँग्रेसचे शहराध्यक्ष संजोग वाघेरे-पाटील, नगरसेवक मयूर कलाटे, राजू मिसाळ, नीलेश डोके यांच्या शिष्टमंडळाने पक्षाचे सर्वेसर्वा शरद पवार यांची सकाळी नऊ वाजता भेट घेतली. मात्र, त्यांच्यासमवेत बनसोडे नव्हते. पक्षसंघटना मजबूत करण्यावर भर द्या, असा सल्ला पवार यांनी शिष्टमंडळाला दिला. अन्य कोणत्याही विषयावर चर्चा केली नाही. या भेटीनंतर शिष्टमंडळाने माजी उपमुख्यमंत्री अजित पवार यांचीही भेट घेतली. या वेळी मात्र बनसोडे उपस्थित होते. त्यामुळे उपस्थितांनाही अजित पवारांविषयीच्या बनसोडे यांच्या प्रेमाची प्रचीती आली. त्यातूनच सर्वांनी घ्यायचा तो बोध घेतला.
....
गेले दोन दिवस मोबाइल 'नॉट रिचेबल' होता. तो अजूनही आहे. वैयक्तिक आणि घरगुती कारणास्तव मी संपर्कात नव्हतो. सर्वजण माझा शोध घेत होते, त्याची जाणीवही होती. मात्र, त्यांच्याशी संपर्क ठेवू शकलो नाही. आता राज्यात शिवसेना-राष्ट्रवादी काँग्रेस आणि काँग्रेस महाआघाडीचे सरकार येणार आहे. त्यामुळे शहरात जोमाने काम करणार आहे. यापेक्षा अधिक माहिती देऊ शकत नाही.
- अण्णा बनसोडे, आमदार
.....