म. टा. प्रतिनिधी, पुणे
गणेशखिंड रोडवरील कॉसमॉस बँकेच्या मुख्यालयातील सर्व्हरवर हल्ला करून ९४ कोटी रुपयांच्या लांबविल्याप्रकरणात सायबर पोलिसांनी ४०० पानांचे दोषारोपपत्र कोर्टात दाखल केले आहे.
पाच आरोपींच्या विरोधात हे दोषारोपपत्र दाखल करण्यात आले आहे. सलमान नईम बेग (वय ३१), सेहबाज फारूख शेख (वय २९), शाहबाज अरीफ खत्री (वय ३०), आसीफ जमील शेख (वय ३१, सर्व. रा. ठाणे), फिरोज यासीन शेख (वय ३७, रा. मुंबई) यांच्या विरोधात दोषारोपपत्र दाखल करण्यात आले. हे आरोपी सध्या न्यायालयीन कोठडीत आहेत.
पुणे पोलिसांच्या सायबर गुन्हे शाखेकडून कॉसमॉस बँक सायबर हल्ल्या प्रकरणाचा तपास सुरू आहे. त्यासाठी विशेष पथकाची स्थापना करण्यात आली आहे. या पथकाने आत्तापर्यंत १३ जणांना अटक केली आहे. १३ जणांविरोधात पोलिसांनी यापूर्वी दोषारोपपत्र कोर्टात दाखल केले आहे. यानंतर या पाच जणांना अटक करण्यात आली होती. त्यांनी राज्यस्थान राज्यातील जयपूर आणि मध्यप्रदेशातील इंदोर येथून एकूण ६१ लाख रुपये काढल्याचे तपासात समोर आले आहे. याचा तपास झाल्यानंतर या पाच जणांविरोधात नुकतेच पोलिसांनी ४०० पानांचे दोषारोपपत्र दाखल केले आहे. पोलीसांनी डिसेंबर २०१८ मध्ये दीड हजार पानांचे दोषारोपपत्र दाखल केले होते.