म. टा. प्रतिनिधी, पुणे
आपआपल्या विभागांतील आवश्यक विकासकामांचा आगामी अर्थसंकल्पात अंतर्भाव करण्यासाठी सूचना करण्याचे आवाहन महापालिकेने नागरिकांना केले आहे. त्यासाठी क्षेत्रीय कार्यालय किंवा महापालिकेच्या वेबसाइटवर अर्ज उपलब्ध करण्यात आले आहेत. नागरिकांकडून सूचविण्यात येणाऱ्या आवश्यक विकासकामांचा अर्थसंकल्पात समावेश करण्यात येणार असून, त्यासाठी विशेष आर्थिक तरतूदही केली जाणार आहे.
महापालिका प्रशासनाकडून २००६-०७ पासून नागरिकांकडून सूचविण्यात आलेल्या विकासकामांचा अतर्भाव अर्थसंकल्पात करण्याचा उपक्रम राबविला जात आहे. आगामी अर्थसंकल्प जानेवारी-फेब्रवारी महिन्यांत सादर करण्यात येणार असल्याने त्याची प्रक्रिया सुरू करण्यात आली आहे. नागरिकांनी सूचविलेल्या विकासकामांसाठी एक कोटी रुपयांपर्यंत आर्थिक तरतूद करण्यात येते. यामध्ये रस्ता, पदपथ, पाण्याची लाइन, ड्रेनेज लाइन, पथ दिवे आदी कामे सूचविणे अपेक्षित आहे. नागरिकांनी कमाल पाच लाख रुपये खर्चाची विकासकामे सूचवणे अपेक्षित आहे. त्यासाठी अर्ज मागविण्यात आले आहेत.