म. टा. प्रतिनिधी, पुणे
पुणे आणि पिंपरी-चिंचवड शहरातील ज्युनियर कॉलेजांमध्ये इयत्ता अकरावीत प्रवेश घेण्यासाठी राबविण्यात येणाऱ्या केंद्रीय अकरावी ऑनलाइन प्रवेश प्रक्रियेत येत्या २५ मेपासून विद्यार्थ्यांना प्रवेश अर्जाचा भाग एक भरता येणार आहे. त्यामुळे प्रवेश अर्ज कसा भरावा, आरक्षणासाठी कोणती कागदपत्रे दाखल करावीत, अॅप्रुव्हल कसे मिळणार, अशा अनेक गोष्टींची माहिती विद्यार्थ्यांना मिळण्यासाठी २२ आणि २३ मे रोजी उद्बोधन वर्गाचे आयोजन करण्यात आले आहे.
दहावीची परीक्षा झाल्यानंतर आता चांगल्या महाविद्यालयात अकरावी प्रवेशासाठी पालक व विद्यार्थ्यांना थोडी तयारी करावी लागणार आहे. अकरावी प्रवेशासाठी आपल्याला कोणते महाविद्यालय हवे आहे, हे विद्यार्थ्यांनी आधीच ठरवून ठेवले असले, तरी त्यांना दहावीच्या गुणांवरच महाविद्यालयांमध्ये प्रवेश मिळणार आहे. इयत्ता अकरावीत प्रवेश घेण्यासाठी इच्छुक असणाऱ्या विद्यार्थी आणि पालकांना केंद्रीय अकरावी ऑनलाइन प्रवेश प्रक्रियेची सविस्तर माहिती मिळावी, यासाठी केंद्रीय अकरावी प्रवेश नियंत्रण समितीद्वारे शहरातील विविध भागांमध्ये उद्बोधन वर्गांचे आयोजन केले आहे. या वर्गांमध्ये विद्यार्थ्यांनी माहिती पुस्तिकेतील प्रवेश अर्जाचे भाग एक आणि दोन कसे भरावे, आरक्षणासाठी कोणती कागदपत्रे दाखल करावीत, अॅप्रुव्हल कसे मिळणार, अशा अनेक मुद्द्यांवर तज्ज्ञांकडून मार्गदर्शन मिळणार आहे.
या वर्गामध्ये प्रवेश अर्ज भरताना विद्यार्थ्यांना कोणतीही अडचण येऊ नये, याची काळजी घेतली जाणार आहे. याशिवाय विद्यार्थी व पालकांच्या समस्यांचे निराकरण करण्यात येणार आहे. प्रत्यक्षात प्रवेश प्रक्रिया सुरू झाल्यानंतर विद्यार्थ्यांना प्रवेश फेऱ्यांच्या याद्यांनुसार विविध महाविद्यालयांच्या प्रवेशाचे कट ऑफ गुण कळतील आणि त्याआधारेच त्यांना अकरावीत प्रवेश मिळणार आहेत. दहावीचा निकाल साधारण जून महिन्याच्या पहिल्या आठवड्यात लागतो. त्यानंतर प्रत्यक्ष कॉलेजांमध्ये प्रवेशाला सुरुवात होते. येत्या २२ आणि २३ मे रोजी होणाऱ्या होणाऱ्या उद्बोधन वर्गाला अधिकाधिक विद्यार्थी व पालकांनी उपस्थित राहावे, असे आवाहन प्रभारी शिक्षण उपसंचालक मीनाक्षी राऊत यांनी केले आहे. दरम्यान, अकरावी प्रवेशासाठी आवश्यक असणाऱ्या माहिती पुस्तिकांचे वितरण शाळांमधून होणार असून, त्याबाबतची माहिती आज, सोमवारी मिळणे अपेक्षित आहे.
...
येथे होणार उद्बोधन वर्ग\B
\B
बुधवार, २२ मे
....
पुणे शहर विभाग : राजीव गांधी ई-लर्निंग स्कूल, सहकारनगर, सकाळी ११ ते १२
पर्वती, धनकवडी, स्वारगेट : राजीव गांधी ई-लर्निंग स्कूल, सहकारनगर, दुपारी १ ते २
पिंपरी, भोसरी विभाग : म्हाळसाकांत ज्युनियर कॉलेज, आकुर्डी, सकाळी ११ ते १२
सिंहगड विभाग : रावसाहेब पटवर्धन माध्यमिक व उच्च माध्यमिक विद्यालय, दांडेकर पुलाशेजारी, दुपारी १ ते २
शिवाजीनगर, औंध, पाषाण विभाग : मॉडर्न असेंब्ली हॉल, मॉडर्न महाविद्यालय, शिवाजीनगर, दुपारी ३ ते ४
चिंचवड, निगडी विभाग : म्हाळसाकांत ज्युनिअर कॉलेज, आकुर्डी, दुपारी ३ ते ४
हडपसर विभाग : सी. बी. तुपे कन्या शाळा सभागृह, हडपसर, सासंकाळी ५ ते ६
...
गुरुवार, २३ मे
कॅम्प, येरवडा विभाग : टाटा असेंब्ली हॉल, नौरोसजी वाडिया कॉलेज, रुबी हॉल शेजारी, सकाळी ११ ते १२
कर्ने नगर, कोथरूड विभाग : कलमाडी हायस्कूल व ज्युनियर कॉलेज, कर्वे नगर, दुपारी ३ ते ४