म. टा. प्रतिनिधी, पुणे
माखनचोर बाळकृष्ण, गोवर्धन पर्वत उचलणारा कृष्ण, कालियामर्दन आणि कंसाचा वध करणारा श्रीकृष्ण, विश्वरूपाचे दर्शन घडवणारा आणि अर्जुनाला भगवद्गीता सांगणाऱ्या कृष्णाची विविध रूपे रसिकांना नृत्याद्वारे नुकतीच अनुभवायला मिळाली. कथक नृत्य कलावंतांनी विविध रचना सादर करून, 'श्यामरंग' या कार्यक्रमाद्वारे श्रीकृष्णाचे स्मरण केले.
निमित्त होते, भारतीय विद्याभवन आणि इन्फोसिस फाउंडेशनतर्फे आयोजित करण्यात आलेल्या 'श्यामरंग' या कार्यक्रमाचे. या कार्यक्रमात डॉ. माधुरी आपटे व त्यांच्या शिष्यांनी कृष्णाची विविध रूपे सादर केली. कृष्णलीलांवर आधारीत शास्त्रीय गायनरचना आणि त्याला मिळालेली कथक नृत्याची साथ, असा नृत्यसंगीताचा संगम या वेळी पाहायला मिळाला. किशोरी जानोरीकर यांनी शास्त्रीय गायन केले. कार्यक्रमाची सुरुवात जानोरकर यांच्या गायनाने झाली. त्यांनी प्रारंभी राग 'बिहाग' सादर केला.
संत तुकारामांचा 'पद्मनाभा, नारायणा' हा अभंगही त्यांनी शैलीदार पद्धतीने सादर केला. कथक नृत्यातील ताल प्रस्तुतीवर श्रीकृष्ण भक्तीचा प्रभाव आहे, तो या कार्यक्रमात सादर झालेल्या रासतालातूनही दिसला. 'नृत्यवेध' संस्थेच्या विद्यार्थिनींनी कळशी नृत्यातून कृष्ण जन्म सोहळा साकारला. त्याला रसिकांनी भरभरून दाद दिली. मल्हार रागावर आधारित नृत्यही विद्यार्थिनींनी सादर केले आणि कालियामर्दनाचा प्रसंगही जिवंत केला. या मैफलीची सांगता भैरवीने झाली.