सोशल नेटवर्किंगमुळे चोरी उघड

ढोलताशा पथकाच्या मदतीने केली अटक
Rohit.Athavale@timesgroup.com
पिंपरी : सोशल मीडिया नेटवर्किंगचा वापर विविध कारणांसाठी होत आहे. कधी एखाद्याची बदनामी तर कधी कोणाला लुबाडणे परंतु हिंजवडी पोलिसांनी वर्षभरापूर्वी याच फेसबुकच्या माध्यमातून लुटमारीचा गुन्हा उघडकीस आणला होता. त्या वेळी पुण्यातील एका प्रसिद्ध ढोलताशा पथकाची मदत, खबऱ्यांचे जाळे आणि तत्कालीन अधिकाऱ्यांचे चातुर्याने सर्व घटनेचा उलगडा झाला होता. उच्चशिक्षित गुन्हेगाराने साथीदारांच्या मदतीने केलेला लुटमारीचा गुन्हा आरटीओमधून स्मार्ट कार्ड चोरीच्या घटनेपर्यंत गेला.
पुणे-बंगलोर मार्गावर हिंजवडी येथे एका इनोव्हा कार चालकाला दोघांनी लिफ्ट मागून कारमध्ये बसल्यानंतर पिस्तुलाचा धाक दाखवून लुटले होते. दोघांचे वर्णन म्हणावे तसे चालकाला सांगता आले नव्हते. एका कॉलेजचे सीसीटीव्ही फुटेज पोलिसांना मिळाले होते. परंतु त्यात आरोपींच्या तोंडाला रुमाल गुंडाळल्याचे दिसत होते. त्यामुळे दोघा लुटारूंना ओळखणे शक्य नव्हते. मात्र, दोघांपैकी एका आरोपीला असलेले थोडे टक्कल आणि त्याच्या केसांची ठेवण यावरून हिंजवडीचे तत्कालीन सहायक निरीक्षक हेमंत पाटील यांनी खबऱ्यांद्वारे एका सराईताची ओळख पटवली. त्यानंतर त्याचा ठावठिकाणा शोधणे तसे अवघड जात होते.
तेव्हा फेसबुकवरून पोलिसांनी त्या सराईताचा शोध घेण्यात सुरवात केली. तेव्हा फेसबुक प्रोफाइल फोटोमध्ये आरोपीने पुण्यातील प्रसिद्ध ढोलताशा पथकाचा गणवेश असलेला पांढरा शुभ्र झब्बा-पायजमा परिधान केला होता. त्यावरून पोलिसांनी त्या पथकाच्या पदाधिकाऱ्यांशी संपर्क केला, तेव्हा हा वादक म्हणजे सराईत गुन्हेगार असल्याचे निष्पन्न झाले. दुसरीकडे या गुन्ह्यात सहभागी असणाऱ्याचे नाव किंवा अन्य कोणतीच माहिती पोलिसांना मिळत नव्हती.
तेव्हा पुन्हा पोलिसांनी ज्याचे नाव निष्पन्न झाले आहे त्याच्या कॉमन फ्रेंड्सची लिस्ट तपासण्यास सुरवात केली. विशेष म्हणजे कॉमन या गुन्हेगाराचे फेसबुक फ्रेंड असणारे आणि अनेकदा चॅटिंग केलेल्यांना आपण कोणाशी फेसबुकच्या माध्यमातून जोडले गेलो आहोत हे देखील माहित नव्हते. तपासाच एकाचे प्रोफाइल आणि त्याचे ‘लोकेशन’ (फोटो काढतानाचे) हिंजवडी असल्याचे दिसले होते. त्यावरून फेसबुक प्रोफाइलचा अभ्यास सुरू केला. या गुन्हेगाराच्या प्रोफाइल फोटोत एक अलिशान कार पोलिसांना दिसली. त्यावरून तत्कालीन तपास पथक तुकाराम टोणपे, राजू केदारी, पुनाजी किरवे, आशिष बोटके, नलीन येणूरकर, सचिन उगले, विवेक गायकवाड, ज्ञानेश्वर मुळे, आण्णा गायकवाड, आतिक शेख या पथकाने प्रथम त्या कारमालकाला पाचारण केले. त्याने दिलेल्या माहितीवरून त्याच्या चालकाचा मावसभाऊ हा दुसरा सराईत गुन्हेगार असल्याचे स्पष्ट झाले आणि दोघांनाही अटक करण्यात आली. ज्या दोघांना पोलिसांनी अटक केली होती, त्यातील एक आरोपी उच्चशिक्षित होता. त्याची कौटुंबिक पार्श्वभूमी शिक्षण, सैन्यदलाशी जोडलेली आहे. या युवकाने चार मोटारी घेऊन ट्रान्सपोर्टचा व्यवसाय सुरू केला होता. त्यात आलेल्या अपयशामुळे मग त्याने हिंजवडीमधील बड्या गृहसंकुलात २५ लाखांची चोरी केली. पोलिसांनी अटक केल्यावर त्याच्या मित्रांनी त्याला जामिनावर सोडवले होते. जामीन मिळवताना आणि अन्य खर्च ज्या लोकांनी केला होता, त्याची परतफेड करण्यासाठी या महाभागाने पुन्हा चोऱ्यामाऱ्या सुरू केल्या. पिंपरी-चिंचवड आरटीआमधून वाहनांची नोंदणी असणारी चार स्मार्टकार्ड चोरली. त्यावरील क्रमांक चोरीच्या वाहनांवर टाकून चोरी करणे सुरू केले. त्याने आपल्या साथीदारांच्या मदतीने अनेक गुन्हे केल्याचे तपासात समोर आले आहे. पोलिसांनी कोर्टाच्या आदेशानुसार तुरुंगात ठेवले होते. मात्र, त्यानंतर जामीन मिळाल्याने ते पुन्हा मोकाट फिरत आहेत.