म. टा. प्रतिनिधी, पुणे
पुण्यातील 'सॉफ्टवेअर एक्स्पोर्टर्स असोसिएशन ऑफ पुणे' अर्थात 'सीप'च्या वार्षिक सर्वसाधारण सभेत अश्विन मेघा यांची अध्यक्ष म्हणून निवड करण्यात आली आहे. याच सभेत विद्याधर पुरंदरे यांची उपाध्यक्ष, स्वप्नील देशपांडे (सचिव), आनंद रानडे (खजिनदार) तर कार्यकारी समितीच्या सदस्यपदी समीर सोमण, एस. रामप्रसाद, अभिजित अत्रे, नितीन देशपांडे, पराग बर्वे, प्रशांत के. एस, आशुतोष पारसनीस, राधिका थरूर यांची निवड करण्यात आली. सॉफ्टवेअर एक्स्पोर्टर्स असोसिएशन ऑफ पुणेची स्थापना १९९८ साली झाली असून, गेल्या २१ वर्षांपासून संस्था कार्यरत आहे. अश्विन मेघा फोर्ज अहेड सोल्युशन्सचे संस्थापक व मुख्याधिकारी असून, त्यांना या क्षेत्रातील १७ वर्षांचा अनुभव आहे.
.
सरकारचा निषेध
अतिवृष्टी व पुरामुळे आपत्कालीन परिस्थिती उद्भवल्याने सरकारने मदतीसाठी काढलेल्या आदेशात दोन दिवस पाण्यात राहणाऱ्यांच मदत देण्यात येईल, असे नमूद केल्याने त्या विरोधात महाराष्ट्र नवनिर्माण सेनेने आंदोलन केले. मदतीच्या अन्नाच्या पाकिटांवर स्वत:चे फोटो छापणारे सत्ताधारी पूरग्रस्तांची क्रूर चेष्टा करीत असल्याचा आरोप मनसेने केला आहे. मनसेच्या आंदोलनात पक्षाचे नेते बाबू वागस्कर, उपाध्यक्ष प्रल्हाद गवळी, राम बोरकर, राहुल गवळी, प्रशांत मते, चंद्रकांत गोगावले, नरेंद्र तांबोळी, विक्रांत अमराळे, कल्पेश यादव, वसंत खुटवड आणि इतर कार्यकर्ते उपस्थित होते.
जवानांसाठी राख्या
आम्ही पुणेकर संस्थेच्या वतीने जनरल झोरावर सिंग ट्रस्ट जम्मू व मूर्तीज् पद्मसुंदर बेकरीच्या सहकार्याने जम्मू-काश्मीरमध्ये तैनात असलेल्या जवानांकरीता पुण्यातून चॉकलेटच्या राख्या पाठविण्यात येत आहेत. त्या राख्यांचे पूजन दृष्टीहीन मुले व मान्यवरांच्या हस्ते सोमवार पेठेतील पद्मसुंदर बेकरी येथे झालेल्या कार्यक्रमात करण्यात आले. या वेळी सहधर्मादाय आयुक्त दिलीप देशमुख, शारदा ज्ञानपीठमचे पं. वसंतराव गाडगीळ, पद्मसुंदर बेकरीचे विक्रम मूर्ती, उषा मूर्ती, हँडिकॅप हेल्पर फाउंडेशनचे संचालक प्रवीण राठी, कार्याध्यक्ष रामदास लढे आदी उपस्थित होते. आम्ही पुणेकर संस्थेचे हेमंत जाधव, अखिल झांजले, समीर देसाई, संतोष पोकट यांनी कार्यक्रमाचे आयोजन केले.