कोंढव्यात एका वळणावर कार उभी करून मोबाइलवर बोलणाऱ्या ऑडी कारच्या चालकाला कार पुढे घेण्यास सांगितल्याने त्याने साथीदारांना बोलावून दोघांना बेदम मारहाण केली. ही घटना शनिवारी रात्री घडली. या प्रकरणी कोंढवा पोलिस ठाण्यात तिघांवर गुन्हा दाखल करण्यात आला आहे.
याबाबत नीतेश मधुकर पोकळे (वय ३०) यांनी तक्रार दिली आहे. त्यानुसार तिघांवर गुन्हा दाखल करण्यात आला आहे. पोलिसांनी दिलेल्या माहितीनुसार, पोकळे व त्यांचे वडील दुचाकीवरून जात होते. त्या वेळी शीतल पेट्रोल पंपाजवळ आल्यानंतर समोरून एक ऑडी कारचालक आला. तो वळणावरच कार थांबवून मोबाइलवर बोलत होता. त्यामुळे पोकळे यांनी त्याला 'कार पुढे घ्या. ट्राफिक जाम झाले आहे,' असे सांगितले. याचा राग कारचालकाला आला. त्याने पोकळे यांच्यासोबत वाद घालत त्याच्या दोन साथीदारांना बोलाविले. दोन साथीदार आल्यानंतर त्या तिघांनी तक्रारदार व त्यांच्या वडिलांना शिवीगाळ करून मारहाण केली. एकाने फायटरने तोंडावर व हातावर बेदम मारहाण केली. यामध्ये दोघेही जखमी झाले आहेत. या प्रकरणी कोंढवा पोलिस तपास करत आहेत.