म. टा. प्रतिनिधी, पुणे
पुणे आंतरराष्ट्रीय चित्रपट महोत्सवाला (पिफ) पुणे महापालिका तीन लाख रुपयांचे आर्थिक साह्य करणार आहे. 'पालिका 'पिफ'ला पूर्वीपासून दर वर्षी तीन लाख रुपये निधी देते. यंदाही हा निधी देण्यात येईल. सरकारच्या नवीन नियमानुसार तीन लाख रुपयांपर्यंत निधी देता देतो,' असे महापौर मुरलीधर मोहोळ यांनी नुकतेच 'मटा'शी बोलताना स्पष्ट केले.
सांस्कृतिक महोत्सव आणि विविध कार्यक्रमांवर महापालिकेतर्फे होणारा खर्च थांबवावा, या संदर्भात उच्च न्यायालयात गेल्या वर्षी याचिका दाखल करण्यात आली होती. उधळपट्टी रोखावी आणि राज्य सरकारने पालिकेला निर्देश द्यावेत, असे न्यायालयाने म्हटले. सरकारने 'जीआर' काढून सर्व महापालिकांना महोत्सवांवरील खर्च थांबविण्याची सूचना केली. यामुळे 'पिफ'ला महापालिकेचे सहकार्य मिळणार का, असा प्रश्न निर्माण झाला. महोत्सवाचे संचालक डॉ. जब्बार पटेल यांना पत्रकारांनी विचारले असता, 'मदत मिळते. मात्र नवीन नियमाची कल्पना नाही,' असे त्यांनी सांगितले.
'महापालिका पाणी, शिक्षण, आरोग्य यासाठी काम करते. मग सांस्कृतिक चळवळीला मदत करून शहराची संस्कृती टिकविणे हेही पालिकेचे काम आहे. बर्लिन, कान, लंडन या महोत्सवांना तेथील स्थानिक स्वराज्य संस्थाच मदत करतात,' अशी टिप्पणी पटेल यांनी केली.
------------
पिंपरी-चिंचवड पालिकेचे 'पिफ'ला सहकार्य नाही
पिंपरी-चिंचवडमध्ये 'पिफ'ला योग्य प्रतिसाद मिळत नाही. आंतरराष्ट्रीय चित्रपट महोत्सवाच्या नियमानुसार १८ वर्षांखालील मुलांना प्रवेश देता येत नाही. पिंपरी-चिंचवड येथे हा नियम पाळला गेला नाही. पिंपरी-चिंचवड महापालिका स्वत:चा वेगळा कॅटलॉग काढते. पालिकेकडून सहकार्य मिळत नाही. पुढील वर्षी मदत न घेता तेथे महोत्सव आयोजित करू.
- डॉ. जब्बार पटेल
------------