‘एटीएम’ टोळीचा पर्दाफाश

मुख्य सूत्रधारासह दोघांना जेरबंद करण्यात यश; तिघे फरार

म. टा. प्रतिनिधी, लोणावळा

पुणे आणि ठाणे जिल्ह्यातील विविध भागांमध्ये एटीएम कार्डच्या मदतीने नागरिकांच्या लाखो रुपयांवर डल्ला मारणाऱ्या उल्हासनगरच्या टोळीतील मुख्य सूत्रधारासह दोघांना जेरबंद करण्यास लोणावळा शहर आणि पुणे ग्रामीणच्या स्थानिक गुन्हे शाखेच्या पोलिस पथकांना यश आले आहे. या टोळीने पुणे जिल्ह्यात चार आणि ठाणे जिल्ह्यात सात ठिकाणी एटीएम कार्डची अदलाबदल करून लाखो रुपयांवर डल्ला मारला असल्याची चौकशीदरम्यान कबुली दिली आहे.
मनोज उर्फ मनीष उर्फ मन्या दत्तू सोनवणे (रा. फ्लॅट क्र. ७०१, शंकर हाइट्स, चिंचपाडा, अंबरनाथ, ठाणे ) असे मुख्य सूत्रधाराचे नाव असून, महेश पांडुरंग घनघर ( रा. उल्हासनगर, ठाणे) अशी सराईत चोरट्यांची नावे आहेत. घनघरच्या विरोधात यापूर्वी ठाणे जिल्ह्यात सात गुन्हे दाखल आहेत. या टोळीतील आणखी तिघेजण फरारी असून, पुणे व ठाणे पोलिस त्यांचा शोध घेत आहेत.
लोणावळा शहर व पुणे ग्रामीण पोलिसांनी दिलेल्या माहिती नुसार पाच ऑगस्टला लोणावळ्यातील स्टेट बँकेच्या एटीएममध्ये लोणावळ्यातील तुंगार्ली येथील सुशील धोंडिबा धनकवडे ( वय ६१) पैसे काढण्यासाठी गेले होते. त्या वेळी आरोपींनी धनकवडे यांच्यावर लक्ष ठेवून त्यांच्याकडील एटीएम कार्ड हस्तगत केले. त्याद्वारे त्यांच्या खात्यातून ३ लाख ४० हजार रुपये काढून पोबारा केला. या घटनेचे दृश्य येथील सीसीटीव्हीमध्ये कैद झाले होते.
पुणे ग्रामीण पोलीस मुख्यालयात कार्यरत पोलिस नाईक वाजे यांच्या मुलीच्या एटीएम कार्डचीही हातचलाखीने अदलाबदल करून खेड (राजगुरुनगर) येथील एटीएम खात्यातून सुमारे १२ लाख रुपये काढून टोळीने पोबारा केला होता. त्यामुळे बनावट एटीएम कार्डची हातचलाखीने अदलाबदल करून नागरिकांच्या पुंजीवर डल्ला मारण्याची अनोखी पद्धत वापरून एटीएममधून पैसे लुटण्याच्या घटनांमध्ये दिवसेंदिवस वाढत होत असल्याचे दिसून आले.
लोणावळा शहर आणि पुणे ग्रामीणच्या स्थानिक गुन्हे शाखेच्या पोलिसांनी या सर्व ठिकाणच्या घटनांचा अभ्यास करून पुणे ग्रामीणचे पोलीस अधीक्षक सुवेज हक, अप्पर पोलिस अधीक्षक तेजस्विनी सातपुते, पुणे ग्रामीणचे स्थानिक गुन्हे शाखेचे पोलिस निरीक्षक दयानंद गावडे, लोणावळा शहर पोलिस निरीक्षक चंद्रकांत जाधव यांच्या मार्गदर्शनाखाली उपलब्ध माहितीच्या आधारे उल्हासनगर येथील काही संशयितांना ताब्यात घेतले. त्यांना पोलिसी हिसका दाखविताच या टोळीतील मुख्य सूत्रधारासह ताब्यात घेतले. अधिक चौकशी केली असता या टोळीने पुणे जिल्ह्यात चार ठिकाणी फसवणूक केल्याचे सांगितले आहे. यामध्ये लोणावळा शहर व बारामती येथे प्रत्येकी एक आणि खेड (राजगुरुनगर) येथील दोन घटनांचा समावेश आहे. घनघर याच्या विरोधात ठाणे जिल्ह्यात सात ठिकाणी गुन्हे दाखल असून, त्यामध्ये कल्याण, अंबरनाथ, शिक्रापूर येथे प्रत्येकी दोन आणि मुरबाड येथे एका गुन्ह्याचा समावेश आहे.

सोळापर्यंत पोलिस कोठडी
सोनवणे आणि घनघर यांना वडगाव न्यायालयात हजर केले असता वडगाव न्यायालयाने १६ ऑक्टोबरपर्यंत पोलिस कोठडी सुनावली आहे. या घटनेचा पुढील तपास लोणावळा शहर पोलिस व पुणे ग्रामीण स्थानिक गुन्हे शाखा करीत आहे.