पुणे : जमिनीवरील 'भोगवटा वर्ग दोन'चा शेरा कमी करण्याच्या कामाला विलंब होत असल्याचे सांगून प्रकल्पग्रस्ताने जिल्हाधिकारी कार्यालयात गुरुवारी आत्महत्येचा प्रयत्न केला. धनाजी गेनबा धुमाळ असे संबंधित व्यक्तीचे नाव असून, त्यांच्यावर बंडगार्डन पोलिस ठाण्यात गुन्हा दाखल करण्यात आला आहे. धुमाळ दौंड तालुक्यातील सोनवणी गावचे रहिवासी आहेत. त्यांची जमीन संपादित करण्यात आली असून, बदल्यात त्यांना पर्यायी जमीन देण्यात आली आहे. मात्र, या जमिनीवरील 'भोगवटा वर्ग दोन'चा शेरा अद्याप कमी झालेला नाही. तो कमी करण्यासाठी धुमाळ यांनी दौंड तहसील कार्यालयात अनेकदा पाठपुरावा केल्यानंतरही दाद मिळाली नसल्याचे दावा त्यांनी केला. याबाबत धुमाळ यांनी गुरुवारी जिल्हाधिकारी कार्यालयात पाचव्या मजल्यावर आत्महत्येचा प्रयत्न केला. पाचव्या मजल्यावर जिल्हाधिकारी, निवासी उपजिल्हाधिकारी, अतिरिक्त जिल्हाधिकारी यांची कार्यालये आहेत. या ठिकाणी मोकळ्या जागेत जाळ्या बसवण्यात आल्या असून, धुमाळ यांनी दुपारी दोन वाजता जाळीवर उडी घेऊन आत्महत्येचा प्रयत्न केला. या घटनेने जिल्हाधिकारी कार्यालयात काही वेळ गोंधळ उडाला होता.
प्रकल्पग्रस्ताचाआत्महत्येचा प्रयत्न
जमिनीवरील 'भोगवटा वर्ग दोन'चा शेरा कमी करण्याच्या कामाला विलंब होत असल्याचे सांगून प्रकल्पग्रस्ताने जिल्हाधिकारी कार्यालयात गुरुवारी आत्महत्येचा ...
महाराष्ट्र टाइम्स.कॉम 14 Jun 2019, 4:00 am