निर्माते अतुल तापकीर यांची आत्महत्या

मटा ऑनलाइन वृत्त । पुणे

'मी आता कायम स्वरुपी माझ्या आईसोबत राहणार याचा मला खूप आनंद आहे', असं सुसाइड नोटमध्ये लिहित निर्माते अतुल तापकीर यांनी आज आत्महत्या केली. जागतिक मातृदिनाच्या दिवशी आणि अचानक घडलेल्या या दुःखद घटनेने मराठी चित्रपट उद्योगाला हादरा बसला आहे.

अतुल तापकीर यांनी पुण्यातल्या हॉटेल प्रेसिंडेटमध्ये विष प्राशन करुन आत्महत्या केली. आत्महत्येपूर्वी तापकीर यांनी फेसबुकवर सुसाइड नोट लिहिली आहे. पत्नी प्रियंकाशी सतत होत असलेल्या वादाला आणि तिच्या जाचाला कंटाळून आत्महत्या करत असल्याचं त्यांनी सुसाइड नोटमध्ये लिहिलंय.

अतुल तापकीर हे 'ढोल ताशे' या चित्रपटाचे निर्माते होते. ३ जुलै २०१५ हा चित्रपट प्रदर्शित झाला. जितेंद्र जोशी, हर्षिता भट्ट, अभिजित खांडकेकर अशा मोठ्या कलाकारांनी चित्रपटात भूमिका केली आहे. पण हा चित्रपट बॉक्स ऑफिसवर आपटला आणि अतुल तापकीर यांचे मोठे नुकसान झाले.



'चित्रपटामुळे कर्जबाजारी झाल्याने पत्नी प्रियंकाने त्रास द्यायला सुरुवात केली. पण त्याकडे दुर्लक्ष करून प्रयत्न सुरुच ठेवले. नंतर दोघांमध्ये वाद होऊन भांडणं होऊ लागली. तिने सर्वत्र बदनामी सुरू केली आणि आपल्या भावांमार्फत मला मारहाणही केली. हे प्रकरण पोलिसात गेले. यामुळे गेल्या सहा महिन्यांपासून मी वेगळा राहतोय. माझ्या दोन मुलांपासूनही दूर ठेवले. पण आता हा त्रास सहन होत नसल्याने मी आत्महत्या करतोय, असं तापकीर यांनी आपल्या फेसबुक पेजवर टाकलेल्या पोस्टमध्ये लिहिलंय.