म. टा. प्रतिनिधी, पुणे
भीम आर्मीचे नेते चंद्रशेखर आझाद उर्फ रावण यांची सभा येत्या ३० डिसेंबर रोजी एसएसपीएमएस मैदानावर आयोजित करण्यात आली आहे. त्यासाठी आयोजकांनी बंडगार्डन पोलिसांकडे परवानगीसाठीचा अर्ज केला आहे; पण गेल्या वर्षी झालेल्या एल्गार परिषदेच्या पार्श्वभूमीवर अर्जावर अद्यापपर्यंत निर्णय घेण्यात आलेला नाही.
कोरेगाव भीमा येथे एक जानेवारीला अनेकजण अभिवादन करण्यासाठी येतात. गेल्या वर्षी एक जानेवारीच्या अगोदरच्या दिवशी पुण्यात एल्गार परिषदेचे आयोजन करण्यात आले होते. या एल्गार परिषदेला माओवाद्यांकडून पैसे पुरविण्यात आल्याचे आरोप पोलिसांनी ठेवले आहेत. तसेच, या एल्गार परिषदेमुळे एक जानेवारी २०१८ ला कोरेगाव भीमा येथे दंगल घडल्याचेही पोलिसांनी म्हटले आहे. त्यानंतर पुणे पोलिसांनी 'एल्गार'चे आयोजक व माओवाद्यांशी संबंधित असलेल्यांना देशभरातून अटक केली होती. या वर्षीदेखील एक जानेवारीच्या पार्श्वभूमीवर भीम आर्मीचे नेते चंद्रशेखर आझाद यांची पुण्यात सभेचे आयोजन करण्यात आले आहे. त्यासाठी आयोजकांनी बंडगार्डन पोलिसांकडे सभेसाठी परवानगी मागितली आहे. पण, बंडगार्डन पोलिसांनी अद्यापपर्यंत सभेला परवानगी दिलेली नाही. या अर्जावर वरिष्ठ अधिकारी चर्चा करून निर्णय घेतील, असे पोलिसांकडून सांगण्यात आले.
याबाबत विशेष शाखेचे पोलिस उपायुक्त अशोक मोराळे यांनी सांगितले, की भीम आर्मीचे नेते चंद्रशेखर आझाद यांच्या सभेसाठी परवानगीचा अर्ज आला आहे. पण, त्याला अद्याप परवनागी दिलेली नाही.
........