म. टा. प्रतिनिधी, पुणे
केंद्रीय माहिती व प्रसारण मंत्रालयाने फिल्म अँड टेलिव्हिजन इन्स्टिट्यूट ऑफ इंडियाचे (एफटीआयआय) अध्यक्ष बी. पी. सिंग यांना मुदतवाढ दिली असून, त्यांचा कार्यकाळ सहा महिन्यांसाठी वाढविण्यात आला आहे. मुदतवाढ घेणार नसल्याचे वारंवार सांगणारे सिंग जबाबदारी कायम ठेवणार का, हे स्पष्ट होऊ शकलेले नाही.
प्रसिद्ध दिग्दर्शक बी. पी. सिंग यांचा एफटीआयआय सोसायटी आणि नियामक मंडळाच्या अध्यक्षपदाचा कार्यकाळ ४ मार्च रोजी संपुष्टात आला. त्यानंतर त्यांना मुदतवाढ द्यायची, की दुसऱ्या व्यक्तीची नियुक्ती करायची हा प्रश्न होता. अध्यक्षपदासह सोसायटी आणि नियामक मंडळाचीही फेररचना करावी लागणार होती. 'करोना'च्या संकटामुळे फेररचना करण्याचे काम पुढे ढकलल्याची शक्यता आहे. यामुळेच सोसायटीच्या अध्यक्षांसह अशासकीय सदस्यांचा कार्यकाळ सहा महिन्यांसाठी वाढविण्यात आला आहे. या सदस्यांत अभिनेते सतीश कौशिक, सेन्सॉर बोर्डाचे अध्यक्ष प्रसून जोशी, अभिनेते डॅनी डेन्झोप्पा, दिग्दर्शक विधु विनोद चोप्रा आणि अभिनेत्री कंगना रनौट यांचा समावेश आहे. 'एफटीआयआय'च्या नियामक मंडळाचे बी. पी. सिंग हे १९वे अध्यक्ष आहेत. यापूर्वी दोनदा अध्यक्षपद भूषविण्याची संधी त्यांना मिळाली आहे.
नियामक मंडळात निर्माते आणि 'एफटीआयआय'चे माजी विद्यार्थी राज कुमार हिरानी, छायादिग्दर्शक महेश अन्ने आणि अभिनेत्री दिव्या दत्ता हे काही प्रमुख सदस्य आहेत. 'एफटीआयआय'च्या सोसायटीसाठी नवीन सदस्यांची नियुक्ती होईपर्यंत हेच सदस्य कार्यरत राहातील, असे केंद्रीय माहिती आणि प्रसारण विभागाने आदेशाद्वारे स्पष्ट केले आहे.
दोन महिन्यांपूर्वी सिंग यांना 'अध्यक्षपदासाठी मुदतवाढ मिळाल्यास घेणार का,' असे पत्रकारांनी विचारले होते. त्या वेळी सिंग यांनी 'एफटीआयआय'चा माजी विद्यार्थी असल्याने विद्यार्थ्यांचे प्रश्न समजून घेऊन काम करता आले, याचे समाधान आहे; पण आता थांबणार आहे. मुदतवाढ मिळाली, तरी घेणार नसल्याचे त्यांनी स्पष्ट केले होते.
लोकप्रिय 'सीआयडी'चे निर्माते
बी. पी. सिंग हे 'एफटीआयआय'च्या १९७२ च्या तुकडीचे छायादिग्दर्शन विभागाचे विद्यार्थी आहेत. 'डायल १००' आणि 'सीआयडी' या लोकप्रिय मालिकांची त्यांनी निर्मिती केली आहे. सीआयडी ही मालिका २२ वर्षे सुरू ठेवण्याचा विक्रम त्यांनी केला आहे. 'एफटीआयआय'मध्ये विविध विषयांवर आधारित लघु अभ्यासक्रम, 'विजय तेंडुलकर लेखक अकादमी' स्थापन करण्याचे श्रेय सिंग यांना जाते.