म. टा. प्रतिनिधी, पुणे पुणे विद्येचे माहेर घर, आयटीचे हब म्हणून ओळखले जात असून या विद्यानगरीत माहिती तंत्रज्ञानाचा मोठ्या प्रमाणात वापर होत आहे. मात्र, पुण्यातील जिल्हा परिषदेच्या (झेडपी) वेबसाइटवर मात्र जिल्हा परिषदेचे पदाधिकारी, सदस्यांची नावे गायब झाल्याचा प्रकार समोर आला आहे. त्यामुळे पुण्यात असूनही 'झेडपी' मात्र माहिती तंत्रज्ञानात मागे असल्याचे स्पष्ट झाले. महाराष्ट्र 'डिजिटल' करण्याचा सरकारचा प्रयत्न आहे. त्याबाबत केंद्रानेही 'डिजिटल इंडिया'ची भूमिका जाहीर केली आहे. अनेक सरकारी, निमसरकारी कार्यालयांमध्ये मोठ्या प्रमाणात तंत्रज्ञानाचा वापर केला जात आहे. जिल्हा परिषदेतील कामकाजाचे अहवाल, इतिवृत्त यासाठी 'गुगल क्लाउड'चा वापर केला जात होता. परंतु जिल्हा परिषदेच्या अधिकृत वेबसाइटवरून पदाधिकारी, सदस्यांची नावेच गायब झाली आहेत. त्यामुळे सदस्यांमधून नाराजी व्यक्त केली जात आहे़ मात्र, हे तांत्रिक कारण आहे की वेबसाइट अद्ययावत केली नाही, याबाबत स्पष्टता होऊ
शकली नाही. जिल्हा परिषदेचे वेबसाइट अद्ययावत करण्याची आवश्यकता आहे. जिल्हा परिषदेच्या बैठकींची कोणतीही माहिती बेवसाइटवर नागरिकांसाठी उपलब्ध नसल्याने अनेकांना त्याचा फटका बसतो. इतर कामांसह आता पदाधिकारी, सदस्यांची नावे गायब असल्याचे समोर आले आहे. पुणे जिल्हा परिषदेची वेबसाइट तपासली असता ती अद्ययावत नसल्याचे दिसून आले आहे. याबाबत आश्चर्य व्यक्त होत आहे. पुणे जिल्हा परिषद ही राज्यातील पहिल्या क्रमांकाची जिल्हा परिषद म्हणून पाहिली जाते़ जिल्हा परिषदेने राबविलेले अनेक उपक्रम आणि योजना राज्यातील इतर जिल्हा परिषदांनी स्वीकारल्या आहेत; तसेच राज्य सरकारनेसुद्धा येथील योजनांची अंमलबजावणी केली आहे. त्यामुळे ही वेबसाइट अद्ययावत असावी, अशी अपेक्षा व्यक्त होत आहे.