बालगंधर्व रंगमंदिर हवे सांस्कृतिक कार्यक्रमांसाठीच

कलाकार, राजकीय नेत्यांची मागणी; राघवेंद्र कडकोळ यांना ‘जीवनगौरव’ प्रदान
म. टा. प्रतिनिधी , पुणे
बालगंधर्व रंगमंदिर हे केवळ सांस्कृतिक कार्यक्रमांसाठीच राखीव असले पाहिजे. येथे सांस्कृतिक कार्यक्रमच व्हायला पाहिजे. राजकीय कार्यक्रम या ठिकाणी होऊ नये, अशी एकमुखी मागणी कलाकार आणि राजकीय नेत्यांनी शनिवारी केली. बालगंधर्व रंगमंदिराच्या ४८ व्या वर्धापन दिवसानिमित्त बालगंधर्व परिवारच्या वतीने आयोजित कार्यक्रमात माजी खासदार रणजीतसिंह मोहिते पाटील यांच्या हस्ते ज्येष्ठ अभिनेते राघवेंद्र कडकोळ यांना जीवनगौरव पुरस्कार देण्यात आला. पालकमंत्री गिरीश बापट, वात्रटिकाकार रामदास फुटाणे, चित्रपट महामंडळाचे अध्यक्ष मेघराज राजेभोसले, अभिनेत्री वर्षा उसगावकर, संस्कृती बालगुडे, अभिनेता सुशांत शेलार, स्थायी समितीचे अध्यक्ष बाळासाहेब बोडके, परिवाराचे उपाध्यक्ष नितीन मोरे, माजी आमदार उल्हास पवार, प्रकाश देवळे, मेहुल सहस्रबुद्धे, बालगंधर्व रंगमंदिराचे माजी व्यवस्थापक अमर परदेशी, व्यवस्थापक भारत कुमावत, चंदूकाका सराफचे अतुल शहा, सुरेश देशमुख, परीक्षित थोरात, स्वप्ना पाटील, धनाजी यमकर उपस्थित होते. मोहिते पाटील म्हणाले,' ‘बालगंधर्व रंगमंदिरात विविध क्षेत्रातील कार्यक्रमच अधिक होतात. मात्र, रंगमंदिर हे सांस्कृतिक कार्यक्रमांसाठी असल्याने तेथे के‍वळ सांस्कृतिक कार्यक्रमच झाले पाहिजे. या चित्रपट महामंडळाच्या मागणीला माझा पाठिंबा आहे. त्याचप्रमाणे बालेवाडी येथील क्रीडा संकुल हे विविध प्रकारच्या खेळांसाठीच राखीव असले पाहिजे. तेथे देखील राजकीय कार्यक्रम होऊ नये. अशावेळी सांस्कृतिक क्षेत्रातील लोकांनीच राजकीय कार्यक्रमांसाठी जागा सुचवावी.’
राजेभोसले म्हणाले, ‘बालगंधर्व रंगमंदीर हे केवळ सांस्कृतिक कार्यक्रमांसाठीच राखीव असले पाहिजे, ही आमची कलाकारांची फार जुनी मागणी आहे. मात्र, ती पूर्ण होत नाही. त्यामुळेच ही मागणी आता राजकीय नेत्यांनी देखील उचलून धरायला पाहिजे. महामंडळ आणि परिवाराच्या माध्यमातून कलाकारांचे प्रश्न सोडविण्याचे प्रयत्न करू.’
उसगावकर म्हणाल्या, ‘सध्या मराठी चित्रपटांना भरपूर यश मिळत आहे.त्यामुळेत मराठी चित्रपट हे केवळ प्रादेशिक भागापुरते मर्यादित न राहता सातासमुद्रापार जात आहे, याचा आनंद होत आहे.’ राघवेंद्र कडकोळ यांना जीवनगौरव पुरस्कार प्रदान करण्यात आला, याचा आनंद होत असल्याचे फुटाणे यांनी सांगितले. पवार यांनी बालगंधर्व रंगमंदिर उभारण्याच्या आणि उद्घाटनाच्या आठवणी सांगितल्या. बापट यांनी कार्यक्रमाला शुभेच्छा दिल्या. राजेभोसले यांनी प्रास्ताविक केले. संतोष चोरडिया यांनी सूत्रसंचालन केले.
.....
बालगंधर्व परिवाराचा जीवनगौरव पुरस्कार मिळाल्याचा मला मनापासून आनंद होत आहे.
- राघवेंद्र कडकोळ, ज्येष्ठ अभिनेते