कायदेशीर निर्बंध हिंदू सणांवरच का?

शहर दहीहंडी उत्सव समितीचा सवाल; प्रशासनाचा निषेध

म. टा. प्रतिनिधी, पुणे

दहीहंडी उत्सवातील साउंड सिस्टीमवर पोलिसांकडून लादण्यात येणारे निर्बंध अवास्तव आहेत. विविध नियमांवर बोट ठेवून आमच्यावर गुन्हे दाखल करणार असल्याचे सातत्याने सांगितले जाते. हिंदू सणांवरच निर्बंध का, असा सवाल उपस्थित करून पुणे शहर दहीहंडी उत्सव समितीने प्रशासनाचा निषेध केला. पालकमंत्री आणि पोलिसांनी आमच्या मागण्यांवर विचार केला नाही तर, यंदा दहीहंडी फोडणार नाही असा इशारा समितीतर्फे शुक्रवारी पत्रकार परिषदेत देण्यात आला.

‘दहीहंडी आणि गणेशोत्सव जवळ आला की प्रशासनाला प्रदूषण आणि इतर नियम आठवतात. अशा वेळी नियमांचे कागद दाखवून मंडळाच्या कार्यक्रमांना वेठीस धरले जाते. यंदा पोलिस प्रशासनाने सर्व मंडळाच्या पदाधिकाऱ्यांसाठी घेतलेल्या बैठकीत केवळ दोनच स्पीकर लावून कार्यक्रम साजरा करण्याचे आदेश दिले आहेत. जास्त स्पीकर वापरल्यास गुन्हा दाखल करू, असे सांगितले आहे. प्रशासनाकडून सातत्याने हिंदू सणांवर निर्बंध का टाकले जातात. वर्षभरात विविध ठिकाणी धार्मिक कार्यक्रमात तसेच जयंतीच्या मिरणुकांमधील ध्वनिप्रदूषणाबद्दल मौन बाळगले जाते. मात्र, आमच्या सणांना नियम का लागतात,’ असा प्रश्न उत्सव समितीचे राहुल म्हस्के यांनी उपस्थित केला.

प्रशासनाच्या भूमिकेचा निषेध करण्यासाठी शहरातील विविध दहीहंडी मंडळे एकत्र आली आहेत. समितीचे सर्व सदस्य आज, शनिवारी पालकमंत्री आणि पोलिसांना भेटून मागण्यांचे निवेदन देणार आहेत. त्यांनी चर्चा करावी, मंडळांची बाजू समजून घ्यावी, ही आमची अपेक्षा आहे. आमच्या मागण्या त्यांनी मान्य न केल्यास शहरातील सर्व दहीहंडी मंडळे हंडी न फोडताच प्रशासनाविषयी नाराजी व्यक्त करणार आहोत, असे राजेंद्र देशमुख यांनी सांगितले.