बारामतीत चोरट्यांचा उच्छाद

पोलिसांचे तपासाचे प्रयत्न अपुरे
म. टा. प्रतिनिधी, बारामती
शहरांसह संपूर्ण उपविभागांत काही दिवसांपासून सुरू असलेल्या घरफोड्या, सोनसाखळी चोरांची दहशत, दुचाकी, मोबाइल चोरी, लूट, अशा गंभीर घटनांनी बारामती उपविभागातील बारामती व इंदापूर येथील नागरिक हादरले आहेत., अजूनही चोरीच्या घटनांमध्ये वाढ होत असून, चोरट्यांना पकडण्यात बारामती पोलिस अपयशी ठरले आहेत.
अनेक नागरिकांच्या घरामधील पाणी मीटर चोरीला जात आहेत. या संदर्भात तक्रार दाखल केल्यानंतरच प्राधिकरणाला आवश्यक असणारा दाखला तातडीने ‘मीटर गहाळ’ असे लिहून दिला जातो. गहाळ असे लिहिल्याने तपासाचा प्रश्नच समोर येत नाही याबाबत नागरिकांनी नाराजी व्यक्त केली.
चोरट्यांवर दहशत बसावी यासाठी रात्रीच्या वेळी पोलिस रात्रीच्या वेळ गस्तही घालतात. मात्र पोलिसांना गुंगारा देऊन गुन्हेगारांनी गेल्या वर्षभरात घरफोड्या केल्या आहेत. पूर्वी बंद घरांना लक्ष्य करणार्‍या चोरांची हिंमत आता वाढली आहे. भरवस्तीत, अपार्टमेंटमध्ये सशस्त्र घुसून ते बेदम मारहाण, लूट करीत आहेत.
राज्यात सर्वात सुरक्षित शहर म्हणून बारामतीकडे पहिले जायचे. बारामती तालुक्यात तीन सहकारी साखर कारखाने आहेत. या साखर कारखान्याचा गळीत हंगाम नुकताच सुरू झाल्याने राज्यातील वेगवेगळ्या भागातून ऊस तोडणी मंजूर, मुकादम त्याच्या साहित्यासह डेरे दाखल बारामतीच्या वेगवेगळ्या भागात होत आहेत. झीरो पोलिस भिगवण रोडवरील टोल नाक्याच्या बाहेर व शहरातील प्रवेश करण्याच्या प्रमुख ठिकाणी ऊस तोड कामगारांच्या गाड्या अडवून चालकाकडून शहरात प्रवेश करण्यासाठी बेकायदा कर वसूल करण्यात येतो. हा एंट्री कर न दिल्यास संबधित वाहन चालकाला मारहाण करण्यात येत माहिती स्थानिक युवक व वाहन चालकांनी सांगितली. शहरातील पोलिस ठाण्यात गुन्ह्यांबाबत तक्रार देण्यास गेल्यावर त्याची नोंद करून घेण्याऐवजी त्याला उडवाउडवीची उत्तरे पोलिसांकडून मिळतात.
--------------
माझा पाणी मीटर चोरीला गेला आहे. त्यानंतर पुन्हा मीटर घेण्यासाठी पाणी पुरवठा विभागाकडे गेलो होतो. मीटर चोरीला गेल्याचे सांगितल्यांनंतर त्यांनी एफआयआर कॉपी मागितली. गुन्हा नोंद न करताच संबधित पोलिसांनी मीटर गहाळ झाल्याचा दाखला दिला. असे अनेक मीटर आमच्या भागातील चोरीला गेले आहेत.
- सचिन पलंगे, नागरिक, बारामती
---------------
ऊस कामगारांची होणाऱ्या अडवणुकीबाबत माहिती घेण्यात येईल. त्याचप्रमाणे याबाबत संबधितांना आदेश देण्यात येईल.
- बापू बांगर, उपविभागीय अधिकारी, बारामती उपविभाग
००००