म. टा. प्रतिनिधी, पुणे
पोलिस पडताळणीचे प्रमाणपत्र देण्यासाठी दोनशे रुपयांची लाच घेताना विश्रांतवाडी पोलिस ठाण्याचा कर्मचाऱ्यास लाचलुचपत प्रतिबंधक विभागाने (एसीबी) अटक केली. त्याच्यावर विश्रांतवाडी पोलिस ठाण्यात गुन्हा दाखल करण्यात आला आहे.
उत्तम जनार्दन गट (वय ३८, रा. विश्रांतवाडी) असे अटक केलेल्याचे नाव आहे. याबाबत २५ वर्षीय व्यक्तीने तक्रार दिली आहे. तक्रारदारांनी रिक्षा चालविण्याचा बॅच काढायचा होता. त्यासाठी त्यांना पोलिस पडताळणीचे प्रमाणपत्र आवश्यक होते. त्यासाठी त्यांनी विश्रांतवाडी पोलिस ठाण्यात अर्ज केला होता. त्यावेळी गट याने प्रमाणपत्र देण्यासाठी तक्रारदारांकडे पाचशे रुपयांची लाच मागितली. त्यामुळे त्यांनी 'एसीबी'कडे तक्रार केली. 'एसीबी'कडून तक्रारीची पडताळणी करण्यात आली. त्या वेळी गट याने तडजोडीअंती दोनशे रुपयांची लाच मागितल्याचे निष्पन्न झाले.