भगतसिंगांना म्हणे १४ फेब्रुवारीला फाशी

सोलापूरच्या शिक्षणाधिकाऱ्यांचा जावईशोध; गोंधळाअंती आदेश रद्द

म. टा. प्रतिनिधी, पुणे

भगतसिंग, राजगुरू आणि सुखदेव यांना १४ फेब्रुवारीला फाशी झाली, असा जावईशोध सोलापूरच्या शिक्षणाधिकाऱ्यांनी लावला आहे. याच दिवशी म्हणजेच ‘व्हॅलेंटाइन डे’ला विद्यार्थ्यांनी क्रांतिकारांच्या प्रतिमांचे, तसेच पालकांचे औक्षण करावे, सोबतच पालकांनी जलद प्रगत शैक्षणिक महाराष्ट्र धोरणासाठी आर्थिक मदत करावी असा तुघलकी आदेश सोलापूरचे प्राथमिक शिक्षणाधिकारी तानाजी घाडगे यांनी शाळांना दिले आहेत. त्यामुळे शिक्षण क्षेत्रात खळबळ उडाली. बराच गोंधळ झाल्यानंतर शिक्षण विभागाने शुक्रवारी हा आदेश रद्द केला.
सरकारी माहितीच्या आधारे भगतसिंग, राजगुरू आणि सुखदेव या क्रांतिकारकांना २३ मार्च १९३१ रोजी फाशी देण्यात आली, असा इतिहास असताना त्यांना १४ फेब्रुवारीला फाशी देण्यात आल्याचा शोध घाडगे यांनी लावला आहे. ‘या दिवशी विद्यार्थ्यांनी आपल्या पालकांना शाळेत बोलवावे. त्यानंतर विद्यार्थ्यांनी क्रांतिकारकांच्या प्रतिमांचे पूजन करून पालकांचे औक्षण करावे. अशाप्रकारच्या उपक्रमांतून विद्यार्थ्यांना देशभक्तीची आणि आपल्या पालकांच्या कष्टाची जाणीव होईल,’ असे आदेशात म्हटले आहे.
‘जगभर १४ फेब्रुवारीला व्हॅलेंटाइन डे साजरा केला जातो. लैंगिक शोषणाच्या आरोपाखाली गजाआड असणारा एक स्वयंघोषित संत आणि त्याचे शिष्य गेल्या काही वर्षांपासून हा दिवस माता पिता पूजन दिवस म्हणून साजरा करतात. अशा लोकांचा हा सांस्कृतिक दहशतवाद शाळांनी राबविण्याची काहीच आवश्यकता नाही. त्यामुळे दिलेला आदेश रद्द करून १४ फेब्रुवारीला शाळांमध्ये होणारे कार्यक्रम थांबवावेत,’ अशी मागणी शिक्षणशास्त्राचे अभ्यासक किशोर दरक यांनी केली.

ती चूक टायपिंगची
घाडगे यांच्या या अजब आदेशावर तीव्र प्रतिक्रिया उमटल्यानंतर शिक्षण विभागाने तो रद्द केल्याची माहिती शिक्षण आयुक्त धीरज कुमार यांनी दिली. भगतसिंग, राजगुरू आणि सुखदेव या क्रांतिकारकांना फाशी दिल्याची आदेशातील तारीख चुकीच्या टायपिंगमुळे झाल्याची कबुली घाडगे यांनी दिली आहे. ‘आमच्या कार्यालयातील एक महिला कर्मचारी दरवर्षी अशा प्रकारचे कार्यक्रम आखतात. यंदाही असाच कार्यक्रम आखण्यात आला. मात्र, तो कार्यक्रम रोषामुळे रद्द केला आहे,’ असेही घाडगे म्हणाले.