रस्त्यांच्या 'थ्री डी मॅपिंग'चा प्रस्ताव मतदानाने मान्य
म. टा. प्रतिनिधी, पुणे
शहरातील रस्त्यांचे स्मार्ट सिटीच्या माध्यमातून 'थ्री डी मॅपिंग' करण्याचा प्रस्ताव सत्ताधारी भाजपने मतदानाच्या जोरावर मान्य करून घेतला. या शिवाय शहरात स्मार्ट एलिमेंट्सचा (रस्त्यांवर काही ठिकाणी मोफत वाय-फाय, ई-कनेक्टिव्हिटी झोन तयार करणे) विषयही मतदानाद्वारे मान्य करण्यात आला. राष्ट्रवादी काँग्रेस, काँग्रेस तसेच शिवसेनेच्या दोन सभासदांनी प्रस्तावाला विरोध केला. मात्र, हा विरोध डावलून भाजपने सर्वसाधारण सभेत प्रस्ताव मान्य केले. मतदानाच्या वेळी काँग्रेसचे नगरसेवक तटस्थ राहिले.
राफेल विमान खरेदीतील कथित घोटाळ्यावरून गाजत असलेल्या 'दसॉल्ट' कंपनीने शहरातील रस्त्यांचे 'थ्री डी मॅपिंग' करण्याची तयारी दर्शवली आहे. स्मार्ट सिटी डेव्हलपमेंट कंपनीने तसा प्रस्ताव काही कंपन्यांबरोबर प्राथमिक चर्चा करून पालिकेच्या सर्वसाधारण सभेसमोर मंजुरीसाठी ठेवला. स्मार्ट सिटीचे सीईओ राजेंद्र जगताप यांनी या प्रस्तावाची माहिती सभागृहात दिली. याबरोबरच 'स्मार्ट एलिमेंटस'चा प्रस्तावही मान्य करण्यात आला. हे दोन्ही विषय स्मार्ट सिटी कंपनीच्या विशेष कार्यक्षेत्रात (औंध-बाणेर-बालेवाडी)राबविण्यात येणार होते. स्थायी समितीने त्याला मान्यता देताना उपसूचना देऊन शहरभर राबविण्याविषयी बजावले. त्यावर सभागृहात जोरदार चर्चा झाली.
स्मार्ट सिटीने यापूर्वी विशेष क्षेत्रासह अनेक उपक्रम शहरातही राबवले आहेत. त्या वेळी सर्वसाधारण सभेची परवानगी का घेतली नाही? आताच ते का आणले? कसली अडचण झाली? असे प्रश्न काँग्रेसचे गटनेते अरविंद शिंदे यांनी विचारले. 'राष्ट्रवादी'चे दिलीप बराटे, सुभाष जगताप, शिवसेनेच्या पृथ्वीराज सुतार यांनी या प्रस्तावाला विरोध केला. विषयाचे डॉकेट (माहिती) जोडलेले नाही. मान्यता कशाला द्यायची हेच माहिती नसताना कशी काय देणार? याचा खर्च कोण करणार? महापालिकेकडे पैसे मागणार का? अशा विचारणा केली. कंपनीने याआधी कामे केलीत त्याची परवानगी घेतली होती का? असे प्रश्न विचारण्यात आले. ही संपूर्ण माहिती दिल्यानंतरच हे प्रस्ताव ठेवावे अशी भूमिका विरोधकांनी मांडली, मात्र याकडे दुर्लक्ष मतदान घेत विषय मान्य करण्यात आले.
०००००