भाजपने ७७ गुंडांना तिकीटं दिली: राज

मटा ऑनलाइन वृत्त । पुणे

भाजपने नाशिकमध्ये ७७ गुंडाना तिकीटं दिली आहेत. हाच भाजपचा खरा चेहरा आहे, असा घणाघात आज मनसे अध्यक्ष राज ठाकरे यांनी पुण्यातील जाहीर सभेत केला. पुण्यात भाजपचे उमेदवार पक्षातल्या जुन्या जाणत्या मंडळींनी नव्हे तर एका बिल्डरने ठरवल्याचा आरोपही राज यांनी केला.

'शिवसेना-भाजपच्या सभा आहेत की आखाडा आहे तेच कळत नाहीय. हे सगळं ठरवून चाललं आहे. निवडणुकीत भांडायचं आणि निवडणुकीनंतर एकत्र यायचं अशीच यांची रणनिती आहे. काँग्रेस-राष्ट्रवादीवाले जसं राजकारण करायचे त्याच पद्धतीने हे दोन्ही पक्ष लोकांना मुर्ख बनवत आहेत', अशी तोफ राज यांनी डागली.

राज यांचं टीकास्त्र...

- पुण्यात काँग्रेस-राष्ट्रवादी १५ वर्षे, मुंबईत सेना-भाजप २५ वर्षं सत्तेत आहे. कोणतेही काम न करता एवढी वर्ष लोक यांना निवडून कसे देतात, याचंच आश्चर्य वाटतं.

- ५० लाख ते १ कोटी रुपये देऊन भाजपने नगरसेवक फोडले आहेत.

- भाजपने नाशकात ७७ गुंडांना उमेदवारी दिली आहे. या पक्षाचा आलेख आता उतरणीला लागला आहे.

- शिवसेना-भाजपच्या भांडणाचा जनतेशी काहीएक संबंध नाही. तुमच्या शहराच्या प्रश्नांवर ते काहीच बोलत नाहीयेत.

- नाशिकमध्ये मी जे बोललो ते करून दाखवलं, माझ्या हाती पुण्याची सत्ता देऊन बघा, मी या शहराचा पूर्ण कायापालट करून दाखवेन.

- शहरातल्या नागरिकांना उत्तम सोयी सुविधा देणं, ती सुंदर बनवणं, घडवणं हे माझं पॅशन आहे.