संभाव्य युतीबाबत आज पहिली बैठक

पुणे : महापालिकेच्या निवडणुकीसाठी भारतीय जनता पक्ष-शिवसेना यांच्यातील संभाव्य युतीबाबतची पहिली औपचारिक बैठक आज, सोमवारी होणार आहे. युती करायची की नाही, करायची झाल्यास जागावाटप काय असेल, दोन्ही पक्षांसाठी सन्मानपूर्वक युती होईल का, अशा अनेक प्रश्नांची दिशा सोमवारच्या बैठकीत ठरण्याची चिन्हे आहेत.

विधानसभेमध्ये आठही आमदार निवडून आल्याने महापालिकेमध्ये स्वबळावरच लढण्याची भावना दोन्ही पक्षाच्या कार्यकर्त्यांकडून व्यक्त केली जात होती. तरीही, मुख्यमंत्री देवेंद्र फडणवीस आणि शिवसेनेचे पक्षप्रमुख उद्धव ठाकरे यांनी पालिकेतील युती संदर्भात बोलणी करण्याच्या सूचना स्थानिक स्तरावरील पदाधिकाऱ्यांना दिल्या आहेत. त्यानुसार, शहरातील भाजप-शिवसेनेच्या नेत्यांची युतीबाबतची बैठक सोमवारी सायंकाळी होणार आहे. पालकमंत्री गिरीश बापट आणि शहराध्यक्ष योगेश गोगावले हे भाजपकडून, तर संपर्कनेते डॉ. अमोल कोल्हे आणि शहरप्रमुख विनायक निम्हण हे शिवसेनेकडून या बैठकीत सहभागी होणार आहेत.

महापालिकेच्या गेल्या निवडणुकीत दोन्ही पक्षांची युती झाली होती. त्यामध्ये, भाजपने ९० तर शिवसेनेने ६२ जागा लढविल्या होत्या. येणाऱ्या महापालिका निवडणुकीत १६२ सदस्य असतील. त्यानुसार, जागावाटप करण्यासाठी प्राथमिक बोलणी या बैठकीत होण्याची शक्यता आहे. शहरात भाजपचे आठही आमदार असल्याने आतापर्यंतच्या सूत्राऐवजी नवे सूत्र भाजपकडून मांडले जाण्याची शक्यता आहे. तर, कोणत्याही परिस्थितीत भाजपच्या सूत्रानुसार जागावाटप पदरात पाडून घेण्याची शिवसेनेची मनस्थिती नाही. सन्मानपूर्वक युतीमध्ये शिवसेनेला योग्य स्थान मिळाले पाहिजे, अशी भूमिका मांडण्यात येत आहे. एकाचवेळी सर्व जागांवर लढण्याची तयारी दोन्ही पक्षांनी यापूर्वीच केली आहे. त्यानुसार, मुलाखतींची प्रक्रिया पूर्ण करण्यात आली असली, तरी अनेक ठिकाणी सक्षम उमेदवारांची वानवा असल्याने युती झाल्यास फायदा अधिक फायदा होईल, अशी शक्यता आता स्थानिक इच्छुकांकडून वर्तवली जात आहे. तसेच, राष्ट्रवादी आणि काँग्रेस यांच्यात आघाडी होण्याचे संकेत मिळत असल्याने युती करूनच निवडणूक लढविणे गरजेचे असल्याचा मतप्रवाह व्यक्त केला जात आहे.