भाजप देणार २७०० प्रमुखांना प्रशिक्षण
म. टा. प्रतिनिधी, पुणे
महापालिकेच्या निवडणुकीचे काउंटडाउन सुरू झाले असून, त्यातच मतदानाचा टक्का वाढवण्यासह ते पक्षाला अनुकूल राहावे, यासाठी ‘हजारी यादी’च्या मूलमंत्राचे धडे भारतीय जनता पक्षाकडून पुन्हा गिरवले जाणार आहेत. शहरातील प्रत्येक हजार मतदारांसाठी नेमण्यात आलेल्या सत्तावीसशे प्रमुखांची दोन तासांची शाळाच या निमित्ताने येत्या रविवारी (१५ जानेवारी) आयोजिण्यात आली आहे.
महापालिकेची आगामी निवडणूक भाजपसाठी स्थानिक स्तरावरील सर्वांत मोठी परीक्षा आहे. या परीक्षेसाठी विविध स्वरूपाचे मार्गदर्शन इच्छुक उमेदवार, कार्यकर्त्यांना केले जात असले तरी परीक्षेतील यशासाठी अत्यावश्यक असलेल्या ‘रामबाण उपाया’वर विशेष सत्र घेतले जाणार आहे. आजवरच्या निवडणुकीच्या विविध परीक्षांमध्ये पक्षाला भरघोस यश मिळवून देणाऱ्या ‘हजारी यादी’चा विषय त्यासाठी निवडण्यात आला असून, सर्व यादीप्रमुखांच्या मार्गदर्शनासाठी थेट दिल्लीहून विषयतज्ज्ञ संघटनमंत्री व्ही. सतीश यांना निमंत्रित करण्यात आले आहे. न्यू इंग्लिश स्कूल, टिळक रोड शाळेच्या ४१ वर्गखोल्यांमध्ये शहरातील सर्व यादीप्रमुखांच्या उजळणीसाठी तासिकाही निश्चित करण्यात आल्या आहेत.
निवडणुकीच्या मुख्य परीक्षेपूर्वी हजारी प्रमुखांसाठी घेण्यात येणाऱ्या या पूर्वपरीक्षेसाठी प्रत्येकाला ओळखपत्र दिले जाणार आहे. ४१ प्रभागांसाठी स्वतंत्र वर्ग निश्चित केले गेले असून, प्रत्येक यादीप्रमुखाला त्याच्याच वर्गात बसावे लागणार आहे. एखाद्या शाळेच्या वेळापत्रकाप्रमाणे हजारी प्रमुखांच्या दिवसाची सुरुवातही राष्ट्रगीत, प्रतिज्ञेने होणार आहे. त्यानंतर, तीन तासिकांमधून आगामी निवडणुकीची तयारी कशी करायची, याचे सविस्तर मार्गदर्शन केले जाणार आहे. पहिला तास हजारी यादीचे काम कसे करायचे, यासाठी खर्ची घालण्यात येणार आहे. दुसऱ्या तासिकेला सोशल मीडिया या नव्या अभ्यासक्रमाचा पाठ घेतला जाईल. तिसऱ्या तासिकेला आचारसंहितेचा धडा गिरवला जाणार आहे. त्यानंतर, संघटनमंत्र्यांच्या मुख्य कार्यक्रमासाठी सर्व वर्गातील हजारी प्रमुखांची शाळेच्या मैदानावर एकत्र बैठकव्यवस्था करण्यात आली आहे. या मुख्य कार्यक्रमात संघटनमंत्र्यांच्या संदेशानुसार सर्व हजारी प्रमुखांना पुढील काही दिवसांत आपापल्या भागांत ‘गृहपाठ’ करावा लागणार आहे. हा गृहपाठ पक्का झाला, तरच भाजपला आगामी निवडणुकीत ‘विशेष प्राविण्य’मिळण्याची शक्यता असल्याने रविवारच्या दोन तासांच्या कार्यक्रमाची शहर भाजपतर्फे जोरदार तयारी सुरू आहे.
सर्व वर्गातून एकाचवेळी मार्गदर्शन
न्यू इंग्लिश स्कूल, टिळक रोडच्या शाळेतील सर्व वर्गांमध्ये ध्वनिक्षेपक बसविण्यात आले आहेत. त्यामुळे, सुरुवातीच्या उद्घोषणा आणि त्यापुढील प्रत्येक तासिकेचे मार्गदर्शन ४१ वर्गात बसलेल्या सर्व हजारी प्रमुखांना एकाचवेळी दिले जाणार आहे.
म. टा. प्रतिनिधी, पुणे
महापालिकेच्या निवडणुकीचे काउंटडाउन सुरू झाले असून, त्यातच मतदानाचा टक्का वाढवण्यासह ते पक्षाला अनुकूल राहावे, यासाठी ‘हजारी यादी’च्या मूलमंत्राचे धडे भारतीय जनता पक्षाकडून पुन्हा गिरवले जाणार आहेत. शहरातील प्रत्येक हजार मतदारांसाठी नेमण्यात आलेल्या सत्तावीसशे प्रमुखांची दोन तासांची शाळाच या निमित्ताने येत्या रविवारी (१५ जानेवारी) आयोजिण्यात आली आहे.
महापालिकेची आगामी निवडणूक भाजपसाठी स्थानिक स्तरावरील सर्वांत मोठी परीक्षा आहे. या परीक्षेसाठी विविध स्वरूपाचे मार्गदर्शन इच्छुक उमेदवार, कार्यकर्त्यांना केले जात असले तरी परीक्षेतील यशासाठी अत्यावश्यक असलेल्या ‘रामबाण उपाया’वर विशेष सत्र घेतले जाणार आहे. आजवरच्या निवडणुकीच्या विविध परीक्षांमध्ये पक्षाला भरघोस यश मिळवून देणाऱ्या ‘हजारी यादी’चा विषय त्यासाठी निवडण्यात आला असून, सर्व यादीप्रमुखांच्या मार्गदर्शनासाठी थेट दिल्लीहून विषयतज्ज्ञ संघटनमंत्री व्ही. सतीश यांना निमंत्रित करण्यात आले आहे. न्यू इंग्लिश स्कूल, टिळक रोड शाळेच्या ४१ वर्गखोल्यांमध्ये शहरातील सर्व यादीप्रमुखांच्या उजळणीसाठी तासिकाही निश्चित करण्यात आल्या आहेत.
निवडणुकीच्या मुख्य परीक्षेपूर्वी हजारी प्रमुखांसाठी घेण्यात येणाऱ्या या पूर्वपरीक्षेसाठी प्रत्येकाला ओळखपत्र दिले जाणार आहे. ४१ प्रभागांसाठी स्वतंत्र वर्ग निश्चित केले गेले असून, प्रत्येक यादीप्रमुखाला त्याच्याच वर्गात बसावे लागणार आहे. एखाद्या शाळेच्या वेळापत्रकाप्रमाणे हजारी प्रमुखांच्या दिवसाची सुरुवातही राष्ट्रगीत, प्रतिज्ञेने होणार आहे. त्यानंतर, तीन तासिकांमधून आगामी निवडणुकीची तयारी कशी करायची, याचे सविस्तर मार्गदर्शन केले जाणार आहे. पहिला तास हजारी यादीचे काम कसे करायचे, यासाठी खर्ची घालण्यात येणार आहे. दुसऱ्या तासिकेला सोशल मीडिया या नव्या अभ्यासक्रमाचा पाठ घेतला जाईल. तिसऱ्या तासिकेला आचारसंहितेचा धडा गिरवला जाणार आहे. त्यानंतर, संघटनमंत्र्यांच्या मुख्य कार्यक्रमासाठी सर्व वर्गातील हजारी प्रमुखांची शाळेच्या मैदानावर एकत्र बैठकव्यवस्था करण्यात आली आहे. या मुख्य कार्यक्रमात संघटनमंत्र्यांच्या संदेशानुसार सर्व हजारी प्रमुखांना पुढील काही दिवसांत आपापल्या भागांत ‘गृहपाठ’ करावा लागणार आहे. हा गृहपाठ पक्का झाला, तरच भाजपला आगामी निवडणुकीत ‘विशेष प्राविण्य’मिळण्याची शक्यता असल्याने रविवारच्या दोन तासांच्या कार्यक्रमाची शहर भाजपतर्फे जोरदार तयारी सुरू आहे.
सर्व वर्गातून एकाचवेळी मार्गदर्शन
न्यू इंग्लिश स्कूल, टिळक रोडच्या शाळेतील सर्व वर्गांमध्ये ध्वनिक्षेपक बसविण्यात आले आहेत. त्यामुळे, सुरुवातीच्या उद्घोषणा आणि त्यापुढील प्रत्येक तासिकेचे मार्गदर्शन ४१ वर्गात बसलेल्या सर्व हजारी प्रमुखांना एकाचवेळी दिले जाणार आहे.