पुण्याच्या महापौरपदी भाजपच्या मुक्ता टिळक

मटा ऑनलाइन वृत्त । पुणे

पुणे महानगरपालिकेच्या महापौरपदी आज अपेक्षेप्रमाणे भाजपच्या मुक्ता टिळक विराजमान झाल्या असून पुण्याच्या इतिहासात पहिल्यांदाच महानगरपालिकेवर 'कमळ' फुललं आहे. मुक्ता टिळक या लोकमान्य टिळकांचे पणतू शैलेश टिळक यांच्या पत्नी आहेत.

पुणे महानगरपालिकेच्या निवडणुकीत भाजपनं 'न भुतो' कामगिरी करून स्पष्ट बहुमत मिळवलं होतं. भाजपचे ९८ नगरसेवक निवडून आले होते. त्यामुळे आजच्या महापौरपदाची निवडणूक ही केवळ औपचारिकताच होती. मुक्ता टिळक यांची उमेदवारी जाहीर झाली, तेव्हाच त्यांच्या गळ्यात महापौरपदाची माळ पडली होती. त्यावर आज महापालिका सभागृहात शिक्कामोर्तब झालं.

भाजपच्या सर्व नगरसेवकांनी महापालिकेत उपस्थित राहून मुक्ता टिळक यांना आपलं मत दिल्यानं ९८ मतांसह त्यांनी बाजी मारली. राष्ट्रवादी काँग्रेसच्या नंदा लोणकर यांना ५२ मतं मिळाली. शिवसेनेच्या उमेदवार संगीता ठोसर यांनी आपला अर्ज मागे घेतला आणि या निवडणुकीत सेनेचे नगरसेवक तटस्थ राहिले. महाराष्ट्र नवनिर्माण सेनेनं या निवडणुकीवर बहिष्कारच टाकला.

मुक्ता टिळक यांनी विमलाबाई गरवारे प्रशाला आणि फर्ग्युसन महाविद्यालयातून शिक्षण पूर्ण केले आहे. मानसशास्त्र विषयातून एमए झालेल्या मुक्ताताईंनी सावित्रीबाई फुले पुणे विद्यापीठाच्या परकीय भाषा विभागातून जर्मनचे शिक्षण घेतले आहे. एवढेच नाही तर, मार्केटिंग विषयातून त्यांनी एमबीएही पूर्ण केले आहे. यासह, पत्रकारितेचा अभ्यासक्रमही त्यांनी पूर्ण केला आहे. त्यामुळे, उच्चविद्याविभूषित महिलेला पुण्याच्या महापौरपदी संधी मिळाल्याने शहराचा विकासही वेगाने होईल, अशी पुणेकरांची अपेक्षा आहे.

मुक्ता टिळक यांच्याबद्दल...

>> मुक्ता टिळक या जयंतराव टिळकांचा पुतण्या शैलेश टिळक यांची पत्नी आहेत.

>> सदाशिव-नारायण पेठेतील प्रभाग क्रमांक १५ मधून त्या निवडून आल्यात.

>> मुक्ता टिळक चौथ्यांदा नगरसेवक म्हणून विजयी झाल्या असून यंदा पुण्यातून सर्वाधिक मतांनी निवडून आल्या आहेत.

>> याआधी पुणे महापालिकेत भाजपच्या गटनेत्या म्हणून त्यांनी जबाबदारी सांभाळली आहे. तसंच, स्थायी समितीच्या सदस्य म्हणूनही त्यांनी काम पाहिलंय.