म. टा. वृत्तसेवा, भोर
पुणे-सातारा महामार्गावरील वेळू गावच्या हद्दीत असलेल्या सी. पी. एच. मॅन्युफॅक्चरिंग कंपनीत बॉयलरचा स्फोट होऊन दोन कामगारांचा मृत्यू झाल्याची घटना बुधवारी सकाळी अकराच्या सुमारास घडली. याप्रकरणी राजगड पोलिस ठाण्यात घटनेची नोंद करण्यात आली आहे. स्फोटाचे निश्चित कारण समजले नाही.
मनेजर रजिंदर प्रसाद (वय २७, रा. बिहार) व विकाससिंग (वय ३५ रा. उत्तर प्रदेश) अशी मृत्यू झालेल्या कामगारांची नावे आहेत. पोलिसांनी दिलेल्या माहितीनुसार, वेळी गावच्या हद्दीत ही कंपनी आहे. सुमारे तीस फूट उंचीच्या शेडमध्ये ही कंपनी असून या ठिकाणी टायरपासून फर्निश ऑइल तयार केले जाते. बुधवारी सकाळी दोन कामगार शेडच्या वरच्या भागात लोखंडी पाइपला वेल्डिंग करत होते. त्या वेळी शेजारी सुरू असलेल्या बॉयलरचा मोठा स्फोट झाला. स्फोटामुळे शेडच्या छप्परचे पत्रे दूर उडून पडले; तर दोन्ही कामगारही उडून अडीचशे फूट अंतरावर जाऊन पडले. या ठिकाणी काम करणारे दहा ते बारा कामगार कंपनीच्या बाहेर पळाले. त्यामुळे मोठी दुर्घटना टळली अशी माहिती स्थानिकांनी दिली.
अकरा वाजता स्फोटामुळे आग लागली. तासाभरांत स्थानिक परिसरासह भोर, कात्रज येथून आलेल्या अग्निशमन दलाच्या गाड्यांनी आग विझवण्यास सुरुवात केली. दुपारी एक वाजता आग आटोक्यात आली. या कंपनीतून येणारा धूर, वास यामुळे नागरिकांना त्रास होत असल्यामुळे ती कंपनी बंद करावी, अशी नोटीस ग्रामपंचायतीने मालकाला दिली असल्याचे पंचायत समितीचे माजी उपसभापती अमोल पांगारे यांनी सांगितले. राजगड पोलिस स्थानकाचे सहायक पोलिस निरीक्षक दत्तात्रय दराडे तपास करीत आहेत. चार महिन्यांत या परिसरातील कासुर्डी व शिंदेवाडी येथील कंपनीमध्ये आगीच्या मोठ्या दुर्घटना झाल्या आहेत.
-----------
मालकाकडून आर्थिक मदत
'भोर तालुक्यातील वेळू गाव येथे झालेली घटना निश्चितच दुर्दैवी आहे. यामागील कारणांची आम्ही सखोल चौकशी करू. या दुर्घटनेमधील मृतांच्या नातेवाइकांना मदत देणे हे आमच्यासाठी प्राधान्याचे काम आहे. मृतांच्या नातेवाइकांना आम्ही तातडीने दोन लाख रुपयांची मदत जाहीर करीत आहोत,' अशी माहिती सीपीएच मॅन्युफॅक्चरिंग कंपनीचे संचालक अनुज छाजेड यांनी दिली.