बोपोडी चौकात वाहतूककोंडी कायम

म. टा. प्रतिनिधी, खडकी

बोपोडी चौकात सतत होत असलेल्या वाहतुकीच्या कोंडीचा प्रश्न कधी सुटणार, असा प्रश्न वाहनचालकांना भेडसावत आहे. बोपोडी चौकात सातत्याने वाहतुकीची कोंडी होत आहे. पुणे-मुंबई रस्त्यावरील बोपोडी चौकात रोज सकाळी आणि संध्याकाळी वाहतूककोंडी होत असते. बोपोडी चौकात होणाऱ्या वाहतूककोंडीमुळे पिंपरीच्या दिशेने फुगेवाडीपर्यंत, पुण्याच्या दिशेने ऑल सेंट हायस्कूल चौकापर्यंत, तर खडकीच्या दिशेने बोर्ड ऑफिसपर्यंत वाहनांच्या रांगा लागल्याचे चित्र मंगळवारी दिसून आले. बोपोडी चौकात वाहतूक शाखेचे पोलिस रात्री उशीरापर्यंत वाहतुक सुरळीत करण्याचा प्रयत्न करीत होते.

चौकातील कोंडी सुटावी यासाठी वाहतूक शाखेच्या पोलिस अधिकाऱ्यांनी मुंबई-पुणे महामार्गावरील हॅरिस पूल संपल्यावर बोपोडी चौकापर्यंत बॅरिकेड लावले आहेत. त्यामुळे काही दिवस वाहतुक सुरळीत झाली होती. मात्र, गेल्या दोन दिवसांपासून पुन्हा वाहतुकीची कोंडी होण्यास सुरुवात झाली आहे. या चौकात रस्ता रुंदीकरण व्हावे यासाठी आरपीआयचे नेते परशुराम वाडेकर यांनी अनेक वेळा आंदोलने केली होती. मात्र, आजपर्यंत त्याचा काहीही उपयोग झालेला नाही. महापालिका प्रशासन त्यांच्या आंदोलनाकडे दुर्लक्ष करीत असल्याचे दिसून आले आहे.