मेट्रो’च्या कामाला गती द्या

‘महामेट्रो’चे व्यवस्थापक ब्रजेश दीक्षित यांची सूचना
म. टा. प्रतिनिधी, पुणे
पिंपरी-चिंचवड ते रेंजहिल्स दरम्यानच्या मेट्रो मार्गाला अधिक गती देण्याच्या स्पष्ट सूचना महाराष्ट्र मेट्रो रेल्वे कॉर्पोरेशनचे (महामेट्रो) व्यवस्थापकीय संचालक ब्रिजेश दीक्षित यांनी दिल्या. तसेच, पावसाळ्याच्या दिवसांमध्ये मेट्रोचे काम सुरू असलेल्या ठिकाणी सुरक्षेची अतिरिक्त खबरदारी घेण्यात यावी, असे निर्देश त्यांनी वरिष्ठ अधिकाऱ्यांना दिले.
पुण्याच्या मेट्रो प्रकल्पाची अंमलबजावणी ‘महामेट्रो’कडे आहे. पिंपरी-चिंचवड ते रेंजहिल्स या १०.७५ किमीच्या प्राधान्य मार्गाच्या ‘व्हायडक्ट’चे काम एनसीसी लिमिटेड या कंपनीने नुकतेच सुरू केले आहे. नाशिक फाट्यालगत पहिल्या खांबासाठी (पिलर) काही दिवसांपूर्वी खोदाई सुरू झाली आहे. दीक्षित आणि मेट्रोच्या वरिष्ठ अधिकाऱ्यांनी नुकतीच या कामाची पाहणी केली. सध्या एकाच पिलरचे काम सुरू असले, तरी पुढील काही दिवसांत आणखी दोन पिलरचे काम सुरू करण्यात येणार आहे. कामाचा वेग अधिक वाढवावा, अशा सूचना दीक्षित यांनी संबंधित कंपनीच्या अधिकाऱ्यांना दिल्या.
पावसाळ्याच्या दिवसांमध्ये मेट्रोचे काम सुरू झाले असल्याने वाहनचालक आणि पादचाऱ्यांच्या सुरक्षेच्या दृष्टीने सर्व उपाययोजना केल्या जाव्या, असेही निर्देश दीक्षित यांनी दिले आहेत. सुरक्षेच्या उपायांची पाहणी मेट्रोच्या अधिकाऱ्यांनी स्वत: करावी आणि काही त्रुटी आढळल्यास त्या तातडीने दूर केल्या जाव्या, असेही त्यांनी स्पष्ट केले.
मेट्रोच्या प्राधान्य मार्गापाठोपाठ वनाज ते शिवाजीनगर धान्य गोदाम या सात किमीच्या मार्गाचे काम येत्या महिनाअखेरपर्यंत सुरू होणार असल्याचे संकेत ‘महामेट्रो’च्या वरिष्ठ अधिकाऱ्यांनी दिले.
--
पावसाळ्याच्या दिवसांमध्ये मेट्रोचे काम सुरू झाले असल्याने वाहनचालक आणि पादचाऱ्यांच्या सुरक्षेच्या दृष्टीने सर्व उपाययोजना केल्या जाव्यात. तसेच, मेट्रोच्या कामाला अधिक गती द्यावी.
- ब्रजेश दीक्षित, व्यवस्थापकीय संचालक, महामेट्रो
०००००००००००००