बीआरटीचा वेग मंदावणार?

अपघातांच्या ठिकाणी तातडीने स्पीडब्रेकर लावण्यास मान्यता
म. टा. प्रतिनिधी, पुणे
नगर रोडवरील जलद बस वाहतूक योजनेतील (बीआरटी) अपघातांची मालिका थांबविण्यासाठी महत्त्वाच्या ठिकाणी पादचाऱ्यांना सहज रस्ता ओलांडण्याकरिता तातडीने स्पीडब्रेकर बसविण्यात येणार आहेत. त्याशिवाय बीआरटी मार्गावर बस चालविणाऱ्या सर्व चालकांना प्रशिक्षण आणि सिग्नल सिंक्रोनायझेशनचे कामही करण्याचा निर्णय मंगळवारी झालेल्या बैठकीत घेण्यात आला.
गेल्या आठवड्यात बीआरटी मार्गावर अपघातांचे सत्र सुरू झाल्यानंतर त्यावर उपाययोजना करण्यासाठी बैठक घेण्यात आली होती. त्याचाच आढावा घेत, उपायांची तातडीने अंमलबजावणी करण्यावर भर देण्याचे मंगळवारच्या बैठकीत निश्चित करण्यात आले. महापालिका आयुक्त कुणाल कुमार यांच्या अध्यक्षतेखाली झालेल्या या बैठकीला महापालिकेच्या वरिष्ठ अधिकाऱ्यांसह पुणे महानगर परिवहन महामंडळाचे (पीएमपी) वरिष्ठ अधिकारी आणि वाहतूक पोलिस; तसेच स्वयंसेवी संस्थांचे प्रतिनिधी उपस्थित होते.
बीआरटी मार्गावर येणाऱ्या पादचाऱ्यांना रस्ता ओलांडणे सोयीचे व्हावे, यासाठी स्पीडब्रेकरची संख्या वाढविण्यात यावी, अशी मागणी वाहतूक पोलिस आणि पीएमपीकडून केली जात होती. त्यानुसार बीआरटी मार्गावर तीन ठिकाणी नव्याने स्पीडब्रेकर बसविले जातील, अशी माहिती पथ विभागप्रमुख राजेंद्र राऊत यांनी दिली.
बीआरटीमध्ये कोणत्याही स्वरूपाचे अपघात होऊ नयेत, यासाठी बसचालकांना प्रशिक्षण देण्यात येणार आहे. हे प्रशिक्षण पीएमपीतर्फे दिले जाणार आहे. यातून अपघातांची संख्या कमी होईल, असा विश्वास व्यक्त केला जात आहे. त्याशिवाय बीआरटी मार्गावरील सिग्नलचे सिंक्रोनायझेशन तातडीने करण्याचा प्रयत्न केला जाणार आहे. त्यामुळे चौकात इतर वाहने बीआरटी मार्गासमोर येणार नाहीत, अशी अपेक्षा आहे. बीआरटीसाठीच्या स्वतंत्र मार्गावर इतर कोणत्याही स्वरुपाच्या वाहनांची घुसखोरी होऊ नये, यासाठी जादा मनुष्यबळ तैनात करण्यास वाहतूक पोलिसांनीही संमती दिली आहे.
...
काम नक्की कोणाकडे?
नगर रोड बीआरटी मार्गाची जबाबदारी नक्की कोणाची, यावरून पालिकेतील अधिकाऱ्यांमध्येच बेबनाव निर्माण झाल्याचे चित्र आहे. बीआरटीचे काम सुरुवातीपासून अधीक्षक अभियंता नामदेव बारापात्रे यांच्याकडे आहे. आळंदी रोडवरील बीआरटी मार्ग कार्यान्वित झाल्यानंतर ही जबाबदारी पथ विभागाचे अधीक्षक अभियंता युवराज देशमुख यांच्याकडे सोपविण्यात आली होती. बीआरटीवर अपघातांची मालिका सुरू झाल्यापासून कोणीच जबाबदारी घेण्यास पुढे येत नसल्याने विभागप्रमुख या नात्याने राजेंद्र राऊत यांनाच बीआरटीच्या कामांविषयीचा खुलासा करावा लागत आहे.