अखेर ऐतिहासिक अर्थसंकल्प मंजूर; सर्वसाधारण सभा गाजली
म. टा. प्रतिनिधी, पुणे
महापालिकेच्या अर्थसंकल्पातील त्रुटी, फुगविण्यात आलेले आकडे यावर सांगोपांग चर्चा करण्यापेक्षा 'सीएए-एनआरसी', स्वातंत्र्यवीर सावरकरांचे विचार पटतात की नाही, भाषण करण्यास संधी का दिली नाही इथपासून हा अर्थसंकल्प अमूक एका समूहाच्या विरोधात असल्याच्या भाषणांनी बुधवारी महापालिकेची सर्वसाधारण सभा गाजली. स्थायी समितीचे अध्यक्ष हेमंत रासने यांनी 'मिळून सारे जण पुण्याचा विकास करूया', अशी साद घातल्यानंतर सर्व पक्षीय नगरसेवकांनी सात हजार ३९० कोटी रुपयांचा अर्थसंकल्प सरतेशेवटी मंजूरही केला.
रासने यांनी सादर केलेल्या अर्थसंकल्पावर महापालिकेच्या सर्वसाधारण सभेत चर्चा तीन दिवस जोरदार चर्चा झाली. सभागृहात कोरम पुकारण्यात आल्याने मंगळवारी सत्ताधाऱ्यांची अडचण झाली होती. त्यामुळे सभा तहकुबीचा निर्णय घेऊन बुधवारी पुन्हा दिवसभर चर्चा करण्यात आली. कोरम पुकारणारे राष्ट्रवादी काँग्रेसचे नगरसेवक गफूर पठाण यांनी चर्चेच्या सुरुवातीलाच कर्ज काढून भ्रष्टाचारावर उधळपट्टी करण्याबाबत केलेली टिप्पणी दिवसभर गाजली. विरोधकांच्या आरोपांना उत्तर देताना माजी सभागृह नेते श्रीनाथ भिमाले यांची विरोधी नगरसेवकांसोबत खडाजंगीही झाली. गटनेत्या अश्विनी लांडगे, सुनीता वाडेकर यांनी ऐतिहासिक भिडे वाड्याचे महत्व लक्षात घेऊन त्याचे तातडीने विकसन करावे, अशी मागणी सभागृहात केली.
मनसेचे गटनेते वसंत मोरे यांनी अर्थसंकल्पातील आकडे फाजील आत्मविश्वासातून फुगवले गेल्याची टीका केली. तसेच, अंदाजपत्रकाच्या पुस्तकात छापलेले फोटोंवर आक्षेप घेऊन अपयशी योजनांचे फोटोसेशन कशाला केले, अशी विचारणाही केली. घनकचरा विभागाच्या कामकाजावर टीका करताना शिवसेनेचे गटनेते पृथ्वीराज सुतार यांनी ५०० कोटी रुपये खर्च होत असताना आपण स्वच्छतेबाबत समाधानी आहोत का, असा प्रश्न उपस्थित केला. काँग्रेसचे गटनेते अरविंद शिंदे यांनीही टोलेबाजी करून माजी मुख्यमंत्री देवेंद्र फडणवीस यांच्या कार्यकाळात एका बड्या टेलिकॉम कंपनीला ३०० किलोमीटरचे रस्ते खोदण्याची परवानगी देऊन कोणतेही शुल्क आकारू नये, असे आदेश दिल्याचा आरोप केला. संबंधित कंपनी आपली जावई आहे का, अशी विचारणाही त्यांनी या वेळी केली. चुकीची कामे करणाऱ्या नगरसेवकांची चौकशी करा. मात्र, एखाद्या-दुसऱ्यामुळे सगळेच नगरसेवक बदनाम होत असून ते योग्य नाही, अशीही भावनाही व्यक्त केली. स्मार्ट व्हिलेजचे गोंडस नाव देऊन सजवलेला अर्थसंकल्प स्वप्नरंजन करणारा असल्याची टीका विरोधी पक्षनेत्या दीपाली धुमाळ यांनी केली. अर्थसंकल्पात फोटोंबाबत झालेली चूक लगेचच दुरूस्त करण्यात आली; मात्र, विरोधकांनी त्याचे राजकारण केले, अशी खंत सभागृह नेते धीरज घाटे यांनी व्यक्त केली. माजी महापौर प्रशांत जगताप यांनी सभागृहात अर्थसंकल्पावर बोलण्यापेक्षा नगरसेवकांवर बोलल्याबाबत त्यांनी नाराजीही व्यक्त केली. काही जणांनी तर दारूड्याने व्यसनमुक्तीवर भाषण द्यावे, अशा अर्विभावात भ्रष्टाचारावर भाषणे केली आहेत. मात्र, भाषणे करताना आपल्या नेत्यांनी केलेल्या भ्रष्टाचाराची त्यांना आठवणही झाली नसल्याचा टोला लगावला.
...
\Bमहापौर, बागवे यांच्यात खडाजंगी \B
अर्थसंकल्पावरील चर्चा मंगळवारी तहकूब करावी लागल्याने गटनेत्यांनी एकत्रित निर्णय घेऊन बुधवारी किती भाषणे होऊ द्यायची, याचा निर्णय घेतला होता. त्यानुसार महापौरांनी भाषणांना परवानगी दिल्याचा दावा सभागृहात केला. मात्र, भाषण करण्यास नकार दिल्याने चिडलेल्या अविनाश बागवे यांनी थेट महापौरांना लक्ष्य केले. या दोघांमध्ये शाब्दिक चकमक उडाल्यानंतर सर्वपक्षीय नेते वेलमध्ये धावून आले आणि त्यांनी तो वाद तेथेच मिटवला. माजी महापौर दत्तात्रय धनकवडे, दिलीप बराटे यांनीही भाषण करण्यास न मिळाल्याने नाराजी व्यक्त केली.