म. टा. प्रतिनिधी, पुणे
'ब्रेनमॅपिंग इंडिया फोरम क्लिनिक'च्या वतीने अतिचंचलता, फिट येणे, फेफरे येणे, एकाग्रता शीघ्र संतापी, मतिमंदता अभ्यासात अडचणी येणाऱ्या रुग्णांना मोफत मार्गदर्शन व निदान केले जाणार आहे. हे शिबिर आजपासून १० मेपर्यंत सुरू राहणार आहे. न्युरोफीडबँक चिकित्सेच्या माध्यमातून ही तपासणी होणार आहे. हे शिबिर औंध येथील ब्रेन मॅपिंग इंडिया फोरम क्लिनिकमध्ये होणार असून, दुपारी २ ते सायंकाळी ७ या वेळेत तपासणी होणार आहे. शिबिरात ब्रेन फिजिओलॉजिस्ट व न्यूरो फीडबॅक फिजिशिअन डॉ. प्रशांत देशमुख मार्गदर्शन करणार आहेत. शिबिरात सहभागी होण्यासाठी ९८२३८३२४४४ या क्रमांकावर संपर्क साधण्याचे आवाहन करण्यात आले आहे.
'सह्याद्री'तर्फे शिबिर
नागरिकांमध्ये कॅन्सरबाबत जनजागृती व्हावी, यासाठी येत्या ५ ते ३१ मेदरम्यान हडपसर, नगर रोड; तसेच डेक्कन शाखांमध्ये मोफत कॅन्सर शिबिरांचे आयोजन करण्यात आले आहे. या अंतर्गत रुग्णांना कर्करोग तज्ज्ञांकडून मोफत सल्ला, सवलतीच्या दरात विविध चाचण्यांचा लाभ घेता येणार आहे. या शिबिरात सहभागी होण्यासाठी ८८८८८२२२२२ या क्रमांकावर संपर्क साधावा, असे आवाहन करण्यात आले आहे.
मृतांना आदरांजली
श्रीलंकेत 'ईस्टर डे'च्या दिवशी झालेल्या साखळी बॉम्बस्फोटात मृत्युमुखी पडलेल्या १३ भारतीयांसह ३२१ नागरिकांना रिपब्लिकन पार्टी ऑफ इंडियातर्फे (आठवले गट) श्रद्धांजली वाहण्यात आली. ससून रुग्णालयासमोरील डॉ. बाबासाहेब आंबेडकर यांच्या पुतळ्यासमोर मेणबत्त्या लावून मृतांना आदरांजली वाहण्यात आली; तसेच या भ्याड दहशतवादी हल्ल्याचा तीव्र निषेध करण्यात आला. या वेळी शहराध्यक्ष अशोक कांबळे, उपमहापौर डॉ. सिद्धार्थ धेंडे, प्रदेश सचिव बाळासाहेब जानराव, निमंत्रक मंदार जोशी, पश्चिम महाराष्ट्र युवक अध्यक्ष परशुराम वाडेकर, शहर युवक अध्यक्ष शैलेंद्र चव्हाण आदी उपस्थित होते.