मुंबई-पुणे एक्स्प्रेस वेवर कारला भीषण अपघात; तीन जण जखमी, लोखंडी डिव्हायडर कारच्या आरपार

बंडू येवले, लोणावळा : मुंबई-पुणे एक्स्प्रेस वेवर कार चालकाचे वाहनावरील नियंत्रण सुटून कार महामार्गावरील संरक्षक लोखंडी दुभाजकावर आदळून भीषण अपघात झाला आहे. या अपघातात एक जण गंभीर तर दोनजण किरकोळ जखमी झाले आहेत. हा अपघात इतका भीषण होता की, मार्गावरील लोखंडी संरक्षक दुभाजक कारच्या आरपार गेले. दैव बलवत्तर म्हणून या भीषण घटनेत कोणतीही जीवितहानी झाली नाही. हा अपघात उर्से टोलनाक्याजवळ सोमाटणे गावच्या हद्दीत शनिवारी सकाळी साडेसातच्या सुमारास झाला.

कार चालक निलकुसूम अल्वा (वय-३५), इवा अमिताभ मुजावर (वय-५५), सारा अमिताभ मुजावर (वय-२५, तिघेही रा. मुंबई) अशी अपघातात जखमी झालेल्यांची नावे आहेत.

शाळा सुटली, स्विटी घराकडे निघाली; गावाजवळ पोहोचताच नियतीनं घात केला; सारेच हळहळले

या अपघाताबाबत वडगाव महामार्ग पोलिसांनी दिलेल्या माहितीनुसार, मुंबईहून पुण्याकडे जाणाऱ्या किया कारच्या (क्रमांक -२३बीएच-५५६०ए) चालकाचे लेन बदलण्याच्या नादात गाडीवरील नियंत्रण सुटल्याने कार मार्गालगतच्या लोखंडी संरक्षक दुभाजकावर जोरात धडकली. ही धडक इतकी भीषण होती की, लोखंडी संरक्षक दुभाजक कारच्या आरपार गेले. मात्र कारमधील तिन्ही जणांचे दैव बलवत्तर म्हणून तिघांचे जीव वाचले.

या भीषण घटनेत एकजण गंभीर तर दोनजण किरकोळ जखमी झाले आहेत. अपघाताची माहिती मिळताच वडगाव महामार्गाचे अधिकारी व कर्मचारी, देवदूत आपत्कालीन पथक व आयआरबीच्या कर्मचाऱ्यांनी घटनास्थळी धाव घेत घटनेची पाहणी करून कारमधील तिन्ही जखमींना तत्काळ बाहेर काढले आणि उपचारासाठी नजिकच्या रुग्णालयामध्ये दाखल केले. त्यानंतर अपघातग्रस्त कार क्रेनच्या सहाय्याने बाहेर काढून बाजूला उभी केली.

दरम्यान, या घटनेचा पुढील तपास परंदवडी पोलीस ठाण्याचे पोलीस करत आहेत.