व्यंगचित्रकार संमेलन यंदा दादरला

फडणीस, सरवटे यांना ‘जीवनगौरव’

म. टा. प्रतिनिधी, पुणे

‘कार्टूनिस्ट्स कंबाइन’ संस्थेतर्फे व्यंगचित्रकारांचे संमेलन आयोजित करण्यात आले आहे. या संमेलनात ज्येष्ठ व्यंगचित्रकार शि. द. फडणीस व वसंत सरवटे यांना जीवनगौरव पुरस्कार प्रदान करण्यात येणार आहे.

‘यंदाचे संमेलन दादर येथील स्वातंत्र्यवीर सावरकर स्मारक येथे १६ व १७ एप्रिल रोजी होणार आहे. संमेलनाचे उद्घाटन ज्येष्ठ चित्रकार रवी परांजपे यांच्या हस्ते होईल. उद्घाटन कार्यक्रमात जीवनगौरव प्रदान करण्यात येणार असून, पन्नास हजार रुपये रोख व सन्मानपत्र असे या पुरस्काराचे स्वरूप आहे,’ अशी माहिती संस्थेचे अध्यक्ष चारुहास पंडित यांनी दिली.

या संमेलनात व्यंगचित्र प्रदर्शन, व्यंगदर्शन व व्यंगचित्र स्पर्धा रंगणार आहेत. ‘कार्टूनिस्ट्स कंबाइन’ हे अखिल भारतीय मराठी व्यंगचित्रकारांचे व्यासपीठ असून, दिवंगत प्रसिद्ध व्यंगचित्रकार बाळासाहेब ठाकरे यांच्या प्रेरणेतून संस्थेची स्थापना झाली आहे. यंदाच्या संमेलनात देशभरातून कलावंत उपस्थित राहणार आहेत. विविध शैलीतील राजकीय, सामाजिक, मनोरंजक व्यंगचित्रे या संमेलनात पाहायला मिळतील. नवोदित चित्रकारांना त्यांची कला या निमित्ताने रसिकांसमोर मांडता येणार आहे. या संमेलनात राज ठाकरे यांच्यासह विविध व्यंगचित्रकार मार्गदर्शन करणार आहेत. व्यंगचित्र स्पर्धेमध्ये सहभागी होण्यासाठी मोबाइलचे वेड, सेल्फी, स्मार्ट सिटी, असहिष्णुता यांपैकी कोणत्याही एका विषयावर व्यंगचित्र काढून २६ मार्चपर्यंत vyangadarshan@gmail.com या ई-मेल अॅड्रेसवर पाठवायचे आहे.