सीसीटीव्हींची सुरक्षा ‘रामभरोसे

भर चौकातून कॅमेऱ्यांच्या बॅटरींची चोरी; पोलिस यंत्रणा हतबल

म. टा. प्रतिनिधी, पिंपरी

दहशतवादी कारवाया, अपघात, चोरी आदी गुन्ह्यांचा छडा लावण्यासाठी तसेच नागरिकांच्या सुरक्षिततेसाठी राज्य सरकारने कोट्यवधी रूपये खर्चून पुणे, पिंपरी-चिंचवड शहरात सीसीटीव्ही कॅमेरे बसविले. मात्र, सीसीटीव्ही कॅमेऱ्यांचीच सुरक्षा रामभरोसे असल्याचे उघड झाले आहे. गेल्या काही दिवसांपासून शहरातील विविध ठिकाणी लावण्यात आलेल्या सीसीटीव्ही कॅमेऱ्यांच्या बॅटरी चोरीला जात असल्याचे उघड झाले आहे.
बॅटरी चोरीबाबत सात पोलिस ठाण्यात गुन्हे दाखल झाले आहेत. विशेष म्हणजे एकाचवेळी चार ठिकाणी चित्रीकरण पाहणाऱ्या पोलिसांनाही याबाबत काहीच माहिती नसल्याने ‘दिव्याखाली अंधार’ असेच म्हणण्याची वेळ आली आहे. येरवडा येथील गुंजन चौकातील सीसीटीव्ही कॅमेऱ्याची बॅटरी चोरीला गेल्याचे नुकतेच उघड झाले. पोलिस आयुक्तालयातून नियंत्रित करण्यात येणाऱ्या या कॅमेऱ्यांच्या देखभालीचे काम ‘अलाइड डिजिटल सर्व्हिसेस’कडून केले जाते. कंपनीत नेटवर्क इंजिनीअर म्हणून कार्यरत असणाऱ्या सतीश जाधव, संतोष हवळे यांना गुंजन चौकातील कॅमेरे काही मिनिटांसाठी बंद झाल्याचे निदर्शनास आले. त्यांनी जागेवर जाऊन पाहणी केली असता सीसीटीव्ही कॅमेऱ्यांसाठी बसविण्यात आलेल्या बॅटरी चोरीला गेल्याचे उघड झाले. या बॅटरीची किंमत २१ हजार रुपये आहे.
विशेष म्हणजे जाधव यांनीच बॅटरीचोर अब्दुल अजीज इस्माईल शेख (५०, रा. आकुर्डी) याला पकडून दिले आहे. शेख हा मार्केट यार्ड येथील भंगाराच्या दुकानात बॅटरी विकत होता. त्या बॅटरी दुकानदाराने बाहेर ठेवल्या होत्या. त्यामुळे चोराचा छडा लावला गेला. शहरातील सर्व प्रमुख चौकात बसविण्यात आलेल्या सीसीटीव्ही कॅमेऱ्यांनी केलेले चित्रीकरण संबंधित पोलिस ठाणे, उपायुक्त कार्यालय आणि पुणे आयुक्तालयातील नियंत्रण कक्षासह वाहतूक शाखेच्या स्वतंत्र नियंत्रणकक्षातून पाहता येते. चौकातून नियमांचे उल्लंघन करणाऱ्यांकडूनही याच कॅमेऱ्याच्या माध्यमातून दंड आकारण्यात येणार आहे.

सात ठिकाणी बॅटऱ्यांची चोरी
भवानी पेठ (खडक), एस. जी. बर्वे चौक (शिवाजीनगर), सांगवी फाटा, होळकर पूल (खडकी) , राजीव गांधी पूल (चतु:श्रृंगी), कोहिनूर चौक (लष्कर), शहीद हेमंत करकरे चौक (कोरेगाव पार्क) आदी ठिकाणांहून शेखने बॅटऱ्यांची चोरी केली आहे. यातील बहुतांश ठिकाणी पोलिसांचा कायमच वावर असतो. तरीही बॅटऱ्यांची चोरी कशी झाली, या विषयी विचारले असता पोलिस अधिकारी मौन बाळगत आहेत. याबाबत गुन्हे शाखेच्या एका उच्चपदस्थ अधिकाऱ्याने माहिती नसल्याचे ‘मटा’शी बोलताना सांगितले.