म. टा. प्रतिनिधी, पिंपरी
सिंधी बांधवांच्या चालिहो उत्सवाला पिंपरी-चिंचवडमध्ये उत्साही वातावरणात नुकताच प्रारंभ झाला. त्यानुसार येथील बाबा झुलेलाल मंदिरात ४० दिवसांसाठी ज्योत प्रज्ज्वलित करून ठेवण्यात आली.
बाबा झुलेलाल यांनी सुमारे एक हजार ६६ वर्षांपूर्वी विश्वशांती, बंधुभाव यांचा संदेश दिला. सर्वांनी एकोप्याने राहावे, एकमेकांमधील सलोखा वाढावा, यासाठी प्रयत्न करणे गरजेचे असल्याची शिकवण बाबा झुलेलाल यांनी दिली होती. त्याची आठवण ठेवत 'चालिहो साहेब उत्सव' सिंधी बांधव दरवर्षी उत्साहात साजरा करतात. या कालावधीत उपवास केले जातात. मांसाहार वर्ज्य केला जातो. मद्यप्राशन केले जात नाही.
बाबा झुलेलाल मंदिरात प्रज्ज्वलित केलेल्या ज्योतीचे दर्शन पिंपरी कॅम्पमधील सिंधी बांधवांनी मोठ्या संख्येने एकत्र येत घेतले. मंदिरात भजन, कीर्तन आदी धार्मिक कार्यक्रम घेण्यात येणार आहेत, असे ट्रस्टने सांगितले आहे. बाबा छतुराम झुलेलाल मंदिर, मुख्य बाजार येथील सचिव जवाहर कोटवानी, मास्टर बल्लूमल, लच्छु तुलसानी, प्रताप बजाज, भगवान खत्री, कुमार मोटवानी यांनी संयोजन केले आहे.