म. टा. प्रतिनिधी, पुणे
चालत्या रिक्षातून पर्स हिसकाविणे, भर रस्त्यातून मोबाइल पळविणे, घरफोडी, सोनसाखळी चोरी, वाहनचोरी, किरकोळ कारणावरून जबर मारहाण अशा घटनांमध्ये गेल्या काही दिवसांमध्ये मोठी वाढ झाली आहे. पोलिस आयुक्तांसह पुण्यातील अकरा अधिकारी नव्याने बदलून आल्यामुळे आता त्यांच्यासमोर 'स्ट्रीट क्राइम' रोखण्याचे मोठे आव्हान राहणार आहे.
पुण्याचे पोलिस नवीन पोलिस आयुक्त म्हणून डॉ. के. वेंकटेशम यांची नियुक्ती करण्यात आली आहे. ते शुक्रवारी पोलिस आयुक्तपदाचा कार्यभार स्वीकारणार आहेत. पुणे पोलिस आयुक्तालयाचे विभाजन करून नवीन पिंपरी-चिंचवड पोलिस आयुक्तालय सुरू होणार आहे. त्यामध्ये पुण्याचे मनुष्यबळ देण्यात येणार आहे. तसेच, पुणे पोलिस आयुक्तालयाची सर्व रचना बदलण्यात येणार आहे. त्यामध्ये झोन, गुन्हे शाखाची पथकांचे कार्यक्षेत्र यांचा समावेश आहे. आयुक्तांबरोबरच सहआयुक्त शिवाजी बोडखे व आठ उपायुक्त, एक अतिरिक्त आयुक्त हे नव्याने दाखल झाले आहेत. आठ उपायुक्तांपैकी फक्त एका उपायुक्ताने पूर्वी पुण्यात काम केले आहे. त्यामुळे पुण्याची कायदा सुव्यवस्था राखून नव्याने घडी बसविण्याचे आव्हान पोलिस आयुक्तांसह नवीन अधिकाऱ्यांसमोर आहे.
गेल्या काही महिन्यांपासून पुण्यात 'स्ट्रीट क्राइम' वाढले आहे. त्यामुळे नागरिकांमध्ये असुरक्षिततेची भावना निर्माण होत आहे. चालत्या रिक्षातून महिलांच्या पर्स हिसकिवल्या जात आहेत. रस्त्यावर उभ्या असलेल्या महिलांबरोबच आता पुरुषांच्या गळ्यातील सोनसाखळी चोरीच्या घटना घडत आहेत. दररोज तीन ते चार घरफोडीचे प्रकार घडत आहेत. उपनगर परिसरात लुटमारीचे प्रकार घडत आहेत. सराईत गुन्हेगार स्थानिक भागात दहशत निर्माण करण्यासाठी वाहनांची तोडफोड, जाळपोळ करत आहेत. किरकोळ कारणावरून वार करण्याच्या घटना वाढत आहेत. या सर्वांवर वचक बसविण्यासाठी नवीन पोलिस आयुक्तांना सराईतांवर ठोस करवाई करावी लागणार आहे. कॉलेज परिसरात, रस्त्यामध्ये तरुणीच्या छेडछाडीचे प्रकार घडले आहेत. महिला सुरक्षेचा प्रश्नाकडे देखील नवीन पोलिस आयुक्तांना गांभीर्याने पाहवे लागणार आहे. गेल्या काही वर्षांत गुन्हेगारी टोळ्यांवर मोक्का व एमपीडीएची कारवाई केल्यामुळे टोळ्यांचे म्होरके तुरुंगात आहेत. पुढील वर्षी निवडणुका असल्यामुळे या गुन्हेगारी टोळ्यांच्या म्होरक्याना बाहेर येऊ न देता पुणे शांत ठेवण्याचे एक मोठे आव्हान नवीन आयुक्तांसमोर राहणार आहे.
सायबर, आर्थिक
गुन्हेगारीची समस्या
पुण्यात सायबर व आर्थिक गुन्हेगारीमध्ये मोठ्या प्रमाणात वाढ झाली आहे. पुण्यात वर्षाला साधारण सहा हजार सायबर गुन्ह्याच्या तक्रारी पुणे पोलिसांकडे येत आहेत. त्यापैकी काहीच गुन्ह्यांचा तपास करून गुन्हे दाखल केले जातात. पुण्यात सायबर पोलिस ठाणे मंजूर असून त्याचे काम देखील पूर्ण झाले आहे. पण, सायबर पोलिस ठाणे सुरू झालेले नाही. हे पोलिस ठाणे सुरू करण्यासाठी नवीन पोलिस आयुक्तांना प्रयत्न करावे लागणार आहेत. त्याबरोबरच पुण्यात मोठ्या आर्थिक फसवणुकीचे गुन्हे वाढत असून त्याचा तपास आर्थिक गुन्हे शाखा करत आहे. आर्थिक गुन्हे शाखेकडे गुन्ह्यांचे प्रमाण वाढत असले, तरी त्या प्रमाणात मनुष्यबळ उपलब्ध नाही. त्यामुळे सायबर व आर्थिक गुन्ह्यांकडे लक्ष देण्याचे काम नवीन आयुक्तांना करावे लागणार आहे.