दानवे यांच्या वक्तव्याचा विपर्यास

महसूलमंत्री चंद्रकांत पाटील यांचा दावा

म. टा. प्रतिनिधी, पिंपरी
शेतकऱ्यांशी थेट संवाद साधण्यासाठी भाजपकडून आयोजित करण्यात येणारी संवादयात्रा ही प्रदेशाध्यक्ष रावसाहेब दानवे यांच्याच नेतृत्वाखाली आयोजित करण्यात येणार असून, दानवे यांच्या वक्तव्याचा माध्यमांनी विपर्यास केल्याचा दावा महसूल मंत्री चंद्रकांत पाटील यांनी केला आहे.

पिंपरी येथील एका खासगी हॉस्पिटलचे उद्घाटन चंद्रकांत पाटील यांच्या हस्ते रविवारी झाले. त्यानंतर पाटील यांनी माध्यमांच्या प्रतिनिधींशी बोलताना दानवे यांची पाठराखण केली. ‘दानवे यांच्या वक्तव्यामुळे शेतकरी दुखावलाच नाही, केवळ माध्यमांनी त्यांच्या वक्तव्याचा विपर्यास केला,’ असा दावा या वेळी पाटील यांनी केला.

दरम्यान, संवाद यात्रा ही प्रामुख्याने पक्ष विस्तार करण्यासाठी काढली जात असून, शिवार सभा आणि शेतकरी संवाद हा त्याचाच एक भाग असल्याचा खुलासा देखील पाटील यांनी या वेळी केला.