मोहरमनिमित्त उद्या वाहतुकीमध्ये बदल

म. टा. प्रतिनिधी, पुणे

शहर आणि उपनगरात मोहरमनिमित्त उद्या, शुक्रवारी (२१सप्टेंबर) ठिकठिकाणी ताबूत, पंजे, छबिने आदींच्या विसर्जन मिरवणुका काढण्यात येणार आहेत. त्यासाठी शहराच्या मध्यवस्तीसह कॅम्प आणि खडकी परिसरात वाहतुकीत बदल करण्यात आला आहे. मिरवणुकांच्या स्थानिक वेळेनुसार हा बदल असणार आहे.

मोहरनिमित्त पर्वती गावातील पटेल हाउस येथून दुपारी दोन वाजता मुख्य मिरवणूक सुरू होणार आहे. तेथून सुरू झालेली मिरवणूक नीलायम पुलापासून यू-टर्न घेऊन सावकर चौकातून जमनालाल बजाज चौक-नेहरू स्टेडिअम-जेधे चौक येथून शिवाजी रस्त्याकडे जाणार आहे. तेथून राष्ट्रभूषण चौक ते फडगेट चौकी, बारा इमाम दर्गा, पानघंटी चौक, मीठगंज पोलिस चौकी, जुनी रामेशी गेट पोलिस चौकी, डावीकडे संत कबीर चौक, पॉवर हाउस चौक, नरतगिरी चौक, मालधक्का चौक, डावीकडे वळून शाहीर अमर शेख चौक, कुंभार वेस चौक, आरटीओ चौक या मार्गे जाऊन संगम पुलावर विसर्जित होणार आहे.

कॅम्पात दुपारपासून वाहतूक बदल

लष्कर भागातील मिरवणूक ताबूत स्ट्रीट येथून दुपारी १२ वाजता सुरू होणार आहे. बाटलीवाला बगीचा, सरबतवाला चौक, बाबाजान दर्गा, भोपळे चौक, महात्मा गांधी रस्ता, कोहिनूर चौक, भगवान महावीर चौक, नाझ हॉटेल चौक, डावीकडे बुटी स्ट्रीटने पुन्हा बाटलीवाला बगीचा चौक येथे दुपारी दोन वाजण्याच्या सुमारास धार्मिक विधीचा कार्यक्रम होणार आहे. त्यानंतर तेथून नेहरू मेमोरियल हॉल, रहीम पेट्रोल पंप, समर्थ पोलिस ठाण्यामार्गे पॉवर हाउस चौक, नरपतगिरी चौक, मालधक्का चौक, शाहीर अमर शेख चौक, कुंभार वेस चौकातून यू-टर्न करून पुन्हा शाहीर अमर शेख चौकातून आरटीओ चौक संगम पुलावर विसर्जन होईल. खडकी परिसरात दुपारी चार वाजता आणि लष्कर परिसरात इमामवाडा येथून सकाळी साडेदहा वाजता ताबूत, पंजे काढण्यात येणार आहेत.