किनवट पोलिसांनी बोधडी येथून घेतले ताब्यात
नांदेड : लळा लागलेल्या एका महिन्याच्या बालकाचे अपहरण करणाऱ्या मुंबईच्या एका २५ वर्षीय महिलेला किनवट पोलिसांनी बुधवारी बोधडी येथून ताब्यात घेतले.
यवतमाळ जिल्हयातल्या खरबी येथील संगीता सुनील राजभग ही महिला काही वर्षांपूर्वी उदरनिर्वाह करण्यासाठी मुंबई येथे गेली होती. मुंबई शहरातल्या भाईंदर परिसरात तिचे वास्तव्य होते. काही महिन्यापूर्वी उत्तर प्रदेशातील कुसूम रोहित यादव ही तरुणी कामाच्या निमिताने मुंबईत आली होती. कालांतराने कुसूम व संगिता हीची ओळख झाली. संगीता हीने कुसूमला राहण्यासाठी भाड्याने खोली दिली. सुमारे पाच महिन्यापूर्वी कुसूम हिची प्रसुती झाली. तिने एका मुलाला जन्म दिला. कुसूम ही मुंबईच्या एका खासगी कंपनीत कामाला असल्याने त्या वेळात ती मुलाला संगीता हीच्याकडे सांभाळ करण्यासाठी ठेवत होती. दिवसभर अभयसिंह याचा सांभळ करताना त्याला तिचा चांगलाच लळा लागला होता. कुसूम यादव ही उत्तर प्रदेशात आपल्या गावी जाणार असल्याची कुणकुण लागल्यानंतर संगीता राजभग अस्वस्थ होती. अभयसिंह आपल्याला सोडून जाणार असल्याचे तिला कळाल्यानंतर तिने अभयसिंहला सोबत घेऊन मुंबई सोडले. नौकरीवरून परत आल्यानंतर कुसूमने मुलाची शोधाशोध घेतला. परंतु तो न सापडल्याने ठाणे जिल्ह्यातल्या नवघर पोलिस ठाण्यात तक्रार नोंदवली.
पाच महिन्याच्या मुलाचे अपहरण झाल्याने पोलिस यंत्रणाही खडबडून जागी झाली. पोलिसांनी संगीता राजभग हिच्या मोबाइलचे लोकेशन तपासले संगीता किनवट तालुक्यातल्या बोधडी येथे असल्याचे स्पष्ट झाल्यानंतर ठाणे पोलिसांनी पोलिस अधिक्षक विजयकुमार मगर यांच्याशी संपर्क साधला. मगर यांनी तात्काळ किनवट पोलिसांना ही माहिती दिल्यानंतर सहाय्यक पोलिस निरीक्षक विजयकुमार कांबळे, कर्मचारी सुरेश माने, महिला कर्मचारी गाजलवाड, गृहरक्षक दलाचे जवान सय्यद फेरोज यांनी बोधडी गाठली. संगीता राजभग या आपल्या बहिणीकडे असल्याचे लक्षात आल्यानंतर रात्री पोलिसांनी तिला ताब्यात घेतले. संगीताला अभयसिंह याच्यासह ठाणे पोलिसांच्या स्वाधिन करण्यात आले. केवळ मुलाचा लळा लागल्याने तिने अपहरण करून नांदेड गाठल्याचे तपासात निष्पन्न झाले आहे.