जिल्ह्यातील पहिलीच घटना; राज्य सायबर सेलची कारवाई
म. टा. प्रतिनिधी, पिंपरी
चाइल्ड पोर्नोग्राफी करणाऱ्या युवकास पिंपरी-चिंचवड पोलिसांच्या सायबर सेलने अटक केली आहे. 'महाराष्ट्र सायबर सेल'ने केलेल्या प्राथमिक तपासात चाइल्ड पोर्नोग्राफीचे व्हिडिओ सोशल मीडियावर शेअर करणारी व्यक्ती पिंपळे गुरवमध्ये असल्याचे समजले. त्यानंतर ही कारवाई करण्यात आली. जिल्ह्यातील अशाप्रकारची ही पहिलीच कारवाई ठरली आहे.
केवा परबाराम देवासी (वय २१, सध्या रा. पिंपळे गुरव, सांगवी; मूळ गाव जि. सिरोई, राजस्थान) असे अटक करण्यात आलेल्याचे नाव आहे. या प्रकरणी सांगवी पोलिस ठाण्यातील फौजदार गणेश माने यांनी फिर्याद दिली आहे. काही दिवसांपूर्वी (५ जानेवारी) देवासी याने फेसबुकवर चाइल्ड पोर्नोग्राफी व्हिडिओ अपलोड केले. हे व्हिडिओ त्याने आपल्या मित्रालाही पाठवला होता. याबाबत दिल्लीस्थित 'एनसीएमईसी' या यंत्रणेमार्फत 'नॅशनल क्राइम रेकॉर्ड ब्यूरो'ने ही माहिती राज्याच्या सायबर सेलच्या प्रमुखांना दिली.
राज्य सायबर सेलकडूनही अशा प्रकारांना आळा घालण्यासाठी काम केले जाते. या टीमने देवासी पिंपरी-चिंचवडमध्ये असल्याचे 'टेक्निकल सर्व्हेलन्स'च्या माध्यमातून हेरले. त्यानंतर तत्काळ पिंपरी-चिंचवड सायबर सेलने देवासी राहात असलेल्या पिंपळे गुरव परिसरात छापा मारून त्याला ताब्यात घेतले. 'चाइल्ड पोर्नोग्राफी' संदर्भात त्याने वापरलेल्या 'गॅझेट्स'ची (मोबाइल, सोशल मीडिया यूजर आयडी) चौकशी करून त्याला सांगवी पोलिसांच्या हवाली केले.
चार वर्षांपूर्वी पुण्यातील कॉलेजमधील मुलींनी सोशल मीडियावर एक ग्रुप तयार केला होता. यामध्ये त्याच कॉलेजचा एक विद्यार्थी मुलीच्या नावाने फेक प्रोफाइल तयार करून सहभागी झाला होता. त्याने ग्रुपमधील मुलींना विवस्त्र फोटोंची मागणी केली आणि धक्कादायक बाब म्हणजे काही मुलींनी तसे फोटोही ग्रुपमध्ये शेअर केले. हे फोटो हाती लागताच त्या मुलाने मुलींना ब्लॅकमेल करण्यास सुरुवात केली. मुलींच्या तक्रारींवरून या मुलाला पुणे सायबर सेलने ताब्यात झाले होते. एका ७० वर्षीय वृद्धाने ओळखीच्या लहान मुलामुलींचे व्हिडिओ आणि फोटो तयार केले होते. या प्रकरणी त्याच्यावर कारवाई झाली होती. मात्र, दिल्ली आणि राज्य सायबर सेलने 'सर्व्हेलन्स' करून एखाद्याचा शोध घेऊन केलेली ही जिल्ह्यातील पहिलीच घटना आहे.
...
'सोशल मीडिया'वर लक्ष
केंद्रीय गृहमंत्रालयाने काही वर्षांपूर्वी पोर्नोग्राफी व्हिडिओ अपलोड करणाऱ्या वेबसाइटवर निर्बंध आणले तसेच, चाइल्ड पोर्नोग्राफीबाबत कडक कारवाईचे धोरण निश्चित केले. मात्र, त्यानंतरही व्हॉट्सअॅप आणि फेसबुक ग्रुपच्या माध्यमातून पोर्नोग्राफी व्हिडिओ शेअर केले जात आहेत. त्यामुळे दिल्ली, महाराष्ट्र आणि जिल्ह्यातील सायबर सेलकडून अशा ग्रुपवर विशेष लक्ष ठेवले जात आहे. सायबर सेलकडील आधुनिक तंत्रज्ञानातून कारवाईचा बडगा उगारला जात आहे.