जीएसटीमुळे महागली चितळेंची बाकरवडी

पुणेः दुपारी एकच्या ठोक्याला कितीही गर्दी असली तर बंद होणारे ‘चितळे बंधू मिठाईवाले’ यांचे दुकान शनिवारी दुपारी बंद झाले नाही. या बदलाचे स्वागत करण्यासाठी अनेक ग्राहकांनी ठरवून दुपारी जाऊन दुकानात खरेदी केली. काळानुसार बदल करून दुपारी १ ते ४ या वेळेत दुकान सुरू ठेवण्याचा निर्णय चांगला आहे, अशी प्रतिक्रिया पुणेकरांनी दिली. दरम्यान, वस्तू व सेवा कर लागू झाल्याने चितळेंची प्रसिद्ध बाकरवडीही महागली आहे.

बाकरवडीची किंमत वीस रुपयांनी महागली असून, यापुढे तीनशे रुपये किलो दराने बाकरवाडी मिळणार आहे. ग्राहकांच्या आग्रहास्तव ‘पुणेरी’ सवय मोडून पुण्यातील काही शाखा १ जुलैपासून दुपारी सुरू राहतील, असे ‘चितळे बंधू’ यांचे इंद्रनील चितळे यांनी दोन महिन्यांपूर्वी एका कार्यक्रमात जाहीर केले होते. त्यानुसार पुण्यातील डेक्कन जिमखाना, सहकारनगर आणि पौड रोड येथील चितळे यांच्या शाखा शनिवारी दुपारी बंद झाल्या नाहीत. बदलेली वेळ नागरिकांसाठी चर्चेचा विषय ठरल्याने पहिल्याच दिवशी काही उत्साही नागरिक आवर्जून दुपारी दुकानात खरेदीसाठी गेले होते.