सव्वाशे कोटींच्या सिगारेटची जप्ती

‘एफडीए’ची रांजणगावसह पाच जिल्ह्यांत कारवाई
म. टा. प्रतिनिधी, पुणे
केंद्रीय आरोग्य मंत्रालयाच्या आदेशानुसार पुणे विभागाच्या अन्न व औषध प्रशासनाने (एफडीए) पुण्यासह पाच जिल्ह्यांतून १२६ कोटींचा सिगारेटचा साठा जप्त केला आहे. त्यापैकी सर्वाधिक सिगारेटचा साठा पुणे जिल्ह्यातील रांजणगाव येथील कंपनीतून जप्त करण्यात आला आहे.
‘केंद्र सरकारने सिगारेट कंपन्यांसाठी काही वैधानिक बाबी निश्चित केल्या आहेत. सिगारेट, तंबाखू प्रतिबंध कायद्याच्या (कोप्टा) कलम ७ (अ) नुसार तंबाखूजन्य पदार्थांवर ‘धूम्रपान आरोग्यास घातक’ असे लिहून धोक्याचे संकेत दाखविणारे चिन्ह अथवा कॅन्सरची तीव्रता ८५ टक्के जाणवेल असे चित्र प्रसिद्ध करण्याची अट घातली आहे. या संदर्भात राज्यभर एक एप्रिलपासून अंमलबजावणी करण्यास सुरुवात झाली आहे. या मोहिमेंतर्गत सध्या कारवाई सुरू आहे. त्यानुसार पुणे विभागातही सिगारेट जप्तीची कारवाई करण्यात आली आहे. पुणे विभागात टाकलेल्या २४ छाप्यांमध्ये १२६ कोटी रुपयांची सिगारेट जप्ती करण्यात आली,’ अशी माहिती ‘एफडीए’चे सहआयुक्त शशिकांत केकरे यांनी दिली. जप्त करण्यात आलेल्या साठ्यामध्ये बड्या कंपन्यांच्या उत्पादनांचा समावेश असल्याचेही ते म्हणाले.
कारवाईंतर्गत रांजणगाव येथील सिगारेटच्या कंपनीमध्येच थेट उत्पादन सुरू असल्याचे आढळून आले. त्यामुळे तेथे छापा मारण्यात आला. या शिवाय शहरातील शिवाजीनगर, खडकी, येरवडा, वाघोली, कोंढवा, नाना पेठ, रास्ता पेठ, पिंपरी, बारामती, भोर तसेच कुपवाड, कराड, सातारा, कोल्हापूर या ठिकाणांहून जप्तीची कारवाई कऱण्यात आली आहे. वरिष्ठांच्या पुढील आदेशापर्यंत राज्यात अनेक ठिकाणी अशा प्रकारची कारवाई सुरूच राहील, असेही केकरे यांनी सांगितले.
सिगारेटच्या पाकिटावर ८५ टक्के चित्र छापण्याची अट असली तरी, ६० टक्के चित्र चालते. तसेच, वैधानिक इशारा देणारे लिखाण २५ टक्के असावे. पुणे विभागात जप्त कऱण्यात आलेल्या सिगारेटचा साठ्यावर जुन्याच पद्धतीचे चित्र प्रसिद्ध करण्यात आले आहे. त्यामुळे तो जप्त करण्यात आला आहे, असे सहायक आय़ुक्त दिलीप संगत म्हणाले.