कोथरूड
बसथांब्यासमोर पार्किंग
येथील उजव्या भुसारी कॉलनी बसथांब्यासमोर सातत्याने कार पार्क केल्या जातात. त्यामुळे बसची वाट पाहणाऱ्या प्रवाशांना रस्त्यावर उभे राहावे लागते. वाहतूक पोलिसांनी या कारचालकांवर कारवाई करावी.
- सुधीर देशपांडे
...
स्वारगेट
वेळापत्रकावर जाहिराती
स्वारगेट येथून कोथरूड डेपो, एनडीए गेट, वारजे माळवाडी, सुतारदऱ्याकडे बस जातात. मात्र, येथील वेळापत्रकावर व्यावसायिकांनी जाहिराती लावल्या आहेत. त्यावर संबंधितांचे क्रमांकही आहेत. पीएमपी कारवाईचे धाडस दाखवेल का?
- अशोक नाकते
...
कोंढवा
पदपथावर हातगाड्या
कोणार्क पुरम लगतच्या आधीच छोट्या असलेल्या रस्त्याच्या या पदपथावर कित्येक महिन्यांपासून हातगाड्या लावल्या आहेत. प्रशासनाने या गाड्या उचलाव्या आणि पदपथ रहिवाशांसाठी उपलब्ध करून द्यावा, ही विनंती.
- नंदकुमार पाटील
...
मनपा भवन
अस्वच्छ स्वच्छतागृह
पुणे महापालिकेच्या अत्यंत सुंदर इमारतीसमोर असलेले हे स्वच्छतागृह अत्यंत अस्वच्छ आहे. त्याच्या स्वच्छतेकडे कोणाचेही लक्ष नाही. अशाने स्वच्छ भारतचे स्वप्न साकार होणार का?
- किशोर मुनोत
...
कोंढवा
पसरले कचऱ्याचे साम्राज्य
कोंढवा परिसरात कचऱ्याचे साम्राज्य पसरले आहे. येथे ठिकठिकाणी कचऱ्याचे ढीग दिसून येतात. त्यामुळे रोगराई पसरण्याचा धोका आहे. महापालिकेने या ठिकाणी कचरा कुंड्यांची व्यवस्था करावी.
- अमिन शेख
...
औंध
दुहेरी पार्किंगकडे दुर्लक्ष
येथील सर्जा हॉटेलकडून गायकवाड नगरकडे जाताना गेले अनेक दिवस दुहेरी पार्किंग केले जात आहे. त्यामुळे येथे सातत्याने वाहतूक कोंडी होते. सुशिक्षित कारचालकांकडून अशी अपेक्षा नाही. वाहतूक पोलिसांनी कारवाई करावी.
- निखिल भोपे