सोलापूर रस्त्यावर बीआरटीला विरोध

हडपसर : सोलापूर रस्त्यावरील बीआरटी मार्गाला स्थानिक नागरिकांनी विरोध दर्शवून त्याविरोधात सह्यांची मोहीम हाती घेतली आहे. महापालिका प्रशासनाने बीआरटीच्या मार्गालगत खासगी वाहनांसाठी तत्काळ एक लेन वाढवावी, अशी मागणी करण्यात येत आहे. येथे सुरू असलेले बीआरटीची कामे चुकीच्या पद्धतीने केली जात असल्याचा आरोपही स्थानिकांनी केला आहे. ‘रस्त्यावरून जाणाऱ्या हजारो खासगी वाहनांसाठी केवळ दोन लेन आणि बीआरटीसाठी एक रिकामी लेन, हा मोठा विरोधाभास आहे. खासगी वाहनचालकांना बीआरटीमुळे मोठ्या त्रासाला सामोरे जावे लागत आहे. त्यामुळे येथे केल्या जाणाऱ्या सुधारणांच्या कामास विरोध करण्यात येत आहे,’ असा दावा स्थानिक नगरसेवक योगेश ससाणे यांनी केला आहे. हडपसरच्या सावली फाउंडेशन या सामाजिक संस्थेने बीआरटीच्या विरोधात सह्यांची मोहीम सुरू केली आहे.

या आहेत सूचना...

- बीआरटी मार्गात खासगी वाहनांसाठी तत्काळ आणखी एक लेन वाढवावी.
- सायकल ट्रॅकवर अनावश्यक खर्च करू नये.
- या मार्गात येणारे चौक बंद करण्यात येणार आहेत. येथील नागरिकांच्या सूचना विचारात घ्याव्यात.
- बीआरटीच्या दुभाजकाशेजारी बफर झोन करण्यात येणार आहे.
- दोन्ही बाजूला एक-एक असा दोन मीटर रस्ता वाया जात आहे.
- नागरिकांना बफर झोन मधून रस्ता ओलांडण्यासाठी महापालिकेने नियोजन केले असले, तरी हा धोकादायक बफर झोन तयार करू नये.
- बीआरटीच्या मधोमध बस स्टॉप करू नये.
- अनावश्यक असा ३५ कोटी रुपये खर्च करण्यात येऊ नये.
...
हडपसर बीआरटी मार्गामुळे रोज सकाळी वाहतूक कोंडीत अडकवावे लागते. या कोंडीमुळे मोठे प्रदूषण या मार्गावर होते. खासगी वाहनांना आणखी एक लेन वाढवली पाहिजे. एकीकडे हजारो वाहने आणि बीआरटीमध्ये केवळ एक बस हा मोठा विरोधाभास आहे.
- सतीश शिंदे, दुचाकीस्वार