नागरिकच ठेवणार ‘क्वारंटाइन’ वर नजर
कँटोन्मेंट बोर्डाची स्वयंसेवकांची फळीम टा...
कँटोन्मेंट बोर्डाची स्वयंसेवकांची फळी
म. टा. प्रतिनिधी, पुणे
करोना संसर्गाच्या पार्श्वभूमीवर परदेशी प्रवास करून आल्याने घरीच विलग (होम क्वारंटाइन) ठेवलेल्या व्यक्तींना काय काळजी घ्यावी, जनसंपर्क कसा टाळावा, सामाजिक अंतर (सोशल डिस्टन्स) कसे राखायचे, आजाराची लक्षणे आढळल्यास काय कार्यवाही करायची, या संदर्भात जनजागृतीसाठी पुणे कँटोन्मेंट बोर्डाच्या सरदार वल्लभभाई पटेल रुग्णालयातर्फे सामाजिक भान असलेल्या स्वयंसेवकांची मदत घेतली जाणार आहे.
रुग्णालयातर्फे या स्वयंसेवकांना करोनाच्या लक्षणांबाबत प्रशिक्षित केले जाणार असून, त्यांच्या सुरक्षेसाठी मास्क, सॅनिटायझर, थर्मल स्कॅनर आदी उपकरणे पुरवली जाणार आहेत. घरीच विलग असलेल्या नागरिकांकडून संसर्ग टाळण्यासाठी पुरेशी खबरदारी घेतली जात आहे की नाही, यावर रुग्णालय प्रशासन या स्वयंसेवकांच्या साह्याने देखरेख ठेवणार आहे.
परदेशी प्रवास करून आलेल्या व्यक्तींना करोनाची लक्षणे न आढळल्यास घरीच विलग राहणे बंधनकारक आहे. त्यासाठी आयडीएसपी नावाचे पोर्टल तयार करण्यात आले आहे. या संकेतस्थळावर परदेशात जाऊन आलेल्या व्यक्तीचे नाव, पत्ता आणि संपर्क क्रमांक आदी तपशील नमूद केले जात आहेत. त्यानुसार लष्कर परिसरात ज्या व्यक्तींना घरीच विलग राहण्याच्या सूचना आहेत, त्या व्यक्तींकडून या सूचनांचे पालन केले जात आहे की नाही, याची खातरजमा करण्यासाठी रुग्णालयातर्फे सामाजिक काम करणाऱ्या स्वयंसेवकांची मदत घेतली जाणार आहे. आतापर्यंत सात ते आठ जणांनी या उपक्रमात सहभाग घेण्याची तयारी दर्शवली असून, त्यांना सोमवारपासून करोनाची लक्षणे, घरीच विलग राहताना पाळावयाचे नियम याबाबत प्रशिक्षित केले जाणार आहे, अशी माहिती रुग्णालय प्रशासनातर्फे देण्यात आली.
परदेशी प्रवास करून आलेल्या व्यक्तींना घरीच विलग राहणे बंधनकारक असून, त्याचे पालन होते की नाही, याची खातरजमा करण्यासाठी स्वयंसेवकांची नेमणूक केली जाणार आहे. रुग्णालयातील परिचारिका, समुपदेशक आणि या स्वयंसेवकांचे पथक संबंधित व्यक्तींना करोनाची लक्षणे, घरीच विलग राहण्याचे नियम, काय काळजी घ्यायची, संपर्क कसा टाळायचा, सामाजिक अंतर कसे राखायचे, याची माहिती देणार आहेत. त्यासाठी या स्वयंसेवकांना प्रशिक्षित केले जाणार असून, थर्मल स्कॅनर, सुरक्षेसाठी मास्क, सॅनिटायझर्स आदी उपकरणे दिली जाणार आहेत. हे स्वयंसेवक दररोजच्या पाहणीचा अहवाल देणार असून, तो आयडीएसपी संकेतस्थळावर सादर केला जाणार आहे,' अशी माहिती सरदार पटेल रुग्णालयाचे निवासी वैद्यकीय अधिकारी डॉ. विद्याधर गायकवाड यांनी दिली.
.........
इच्छुकांनी संपर्क साधण्याचे आवाहन
करोना संसर्गामुळे सर्वसामान्यांमध्ये भीतीचे वातावरण असून, साधा ताप, सर्दी, खोकला झाला, तरी अनेक रुग्ण भयभीत होत आहेत. त्या पार्श्वभूमीवर लष्कर परिसरातील रुग्ण, नागरिकांच्या जागृतीसाठी बोर्डाच्या सरदार पटेल रुग्णालयातर्फे स्वयंसेवकांची नेमणूक केली जाणार आहे. या उपक्रमात सहभागी होण्यास इच्छुकांनी आपले नाव, पत्ता, वय व संपर्क क्रमांक ९८२३१४९१५१ या क्रमांकावर एसएमएस करावे, असे आवाहन बोर्डाचे सदस्य दिलीप गिरमकर यांनी केले आहे.