म. टा. प्रतिनिधी, पुणे
देशभरातील ६२ कँटोन्मेंटमध्ये दिल्या जाणाऱ्या नागरी सुविधा एका क्लिकवर नागरिकांना उपलब्ध करून देण्याच्या उद्देशाने संरक्षण मंत्रालयातर्फे 'ई-छावणी' हे वेबपोर्टल विकसित करण्यात येत आहे. प्रायोगिक तत्त्वावर या पोर्टलचे कामकाज लवकरच सुरू केले जाणार असून, त्यासाठी पुणे कँटोन्मेंट बोर्डासह देशभरातील पाच कँटोन्मेंट बोर्डांची निवड करण्यात आली आहे.
या पोर्टलमुळे मिळकत करभरणा, व्यापार परवाने, बांधकाम परवाने, मॅरेज हॉलचे आरक्षण, अग्निशमन विभागाचे 'ना हरकत प्रमाणपत्र', पाणी पट्टी व सांडपाणी व्यवस्थापन शुल्क भरणा, तक्रार निवारण आदी कामे कँटोन्मेंटवासीयांना ऑनलाइन करता येणार आहेत. केंद्र सरकारच्या ई-गव्हर्नन्स धोरणाला चालना देण्याच्या उद्देशाने मंत्रालयातर्फे हे पोर्टल विकसित केले जात आहे. त्यासाठी संरक्षण मालमत्ता विभागातर्फे ८ मे रोजी ई-गव्हर्न फाउंडेशनसोबत सामंजस्य करार केला आहे.
सध्या प्रायोगिक तत्त्वावर हे पोर्टल चालविण्यात येणार असून, त्यासाठी पुण्यासह सिकंदराबाद, आग्रा, लखनौ, दिल्ली कँटोन्मेंटची निवड करण्यात आली आहे. त्यामुळे बोर्डाच्या कारभारात पारदर्शकता व गती येणार असून, रहिवाशांना आवश्यक सुविधांचा लाभ मिळणार आहे.
विशेष म्हणजे या पोर्टलमुळे नागरिकांना त्यांच्या कामासंदर्भातील; तसेच तक्रारीसंदर्भातील कार्यवाहीची वेळोवेळी माहिती मिळणार आहे. कँटोन्मेंटच्या नागरी सुविधांचे ई-व्यवस्थापन करणारे हे पोर्टल लवकरच कार्यान्वित होईल, अशी माहिती बोर्ड प्रशासनातर्फे देण्यात आली.