निम्म्या पैशांत दुप्पट ‘अॅव्हरेज’

दुचाकीचे ‘सीएनजी कीट’ दिवाळीनंतर; पेट्रोलच्या तुलनेत खर्च कमी

पुणे : गाडी ‘अॅव्हरेज’ किती देते? हा सर्वांच्या कुतूहलाचा विषय. नवीन गाडी खरेदी करतानाही याचाच सर्वप्रथम विचार केला जातो. मात्र, आता नवीन तंत्रज्ञानानुसार स्कूटर प्रकारातील गाड्यांचे ‘एव्हरेज’ पेट्रोलच्या तुलनेत जवळपास निम्म्या पैशांत दुपटीने वाढविणे शक्य होणार आहे. या वाहनांचे ‘सीएनजी कीट’ महिनाअखेरपर्यंत उपलब्ध होण्याची शक्यता असून, त्याद्वारे ४७ रुपयांत ७२ ते ७५ किमी गाडी धावू शकते. शहरात सात लाख ६८ हजार २५४ स्कूटर आहेत. त्यांना या नवीन तंत्रज्ञाचा लाभ होऊ शकतो.
वाहनांच्या वाढत्या संख्येमुळे प्रदूषणातही मोठी भर पडत आहे. त्यामुळे पारंपरिक इंधनाला पर्याय म्हणून सीएनजीचा चारचारी व तिनचाकी वाहनांसाठी वापर केला जात आहे. पुण्यामध्ये काही महिन्यांपूर्वीच त्याबाबत एक पाऊल पुढे टाकण्यात आले असून, ‘सीएनजी’वर चालणाऱ्या दुचाकीच्या पर्वाचा प्रारंभ झाला. ‘महाराष्ट्र नॅचरल गॅस लिमिटेड’ (एमएनजीएल) व काही खासगी कंपन्यांच्या पुढाकाराने स्कूटर संवर्गातील वाहनांसाठी ‘सीएनजी कीट’ बनविण्यात आले आहे. हे सीएनजी कीट लवकरच खुल्या बाजारात उपलब्ध होणार आहे. येत्या महिनाअखेरीस केंद्रीय पेट्रोलियम मंत्र्यांच्या उपस्थितीत याचा उद्घाटनाचा कार्यक्रम होण्याची शक्यता आहे, अशी माहिती ‘एमएनजीएल’च्या वरिष्ठ अधिकाऱ्यांनी दिली.
गेल्या वर्षी नोव्हेंबर महिन्यात पाच स्कूटरला सीएनजी कीट बसवून, त्याची चाचणी घेण्यात आली. ती चाचणी यशस्वी झाल्यामुळे आता स्कूटरचे सीएनजी कीट बाजारात उपलब्ध करून देण्याचा मार्ग खुला झाला आहे. दरम्यान, येत्या काळात ‘बाईक’चे कीट देखील बाजारात उपलब्ध होईल. सध्या त्याच्या निर्मितीचे काम सुरू आहे. ऑटोमोटिव्ह रिसर्च असोसिएशन ऑफ इंडियाची (एआरएआय) मान्यता मिळाल्यानंतर ते विक्रीसाठी बाजारात येईल.
१५ ते १८ हजार रुपये खर्च
स्कूटरला सीएनजी कीट बसविण्यासाठीचा खर्च एकरकमी पेलता यावा, या उद्देशाने सीएनजी कीटसाठी बँकांमार्फत अर्थसहाय्य करण्यात येणार आहे. त्या दृष्टिने बँकांच्या अधिकाऱ्यांशी बोलणे देखील झाले असून, त्यांनी त्यास मान्यता देखील दिली आहे. त्यामुळे सामान्यातील सामान्य व्यक्ती देखील बँक अर्थसहाय्याने सीएनजी कीट बसवू शकते. साधारणपणे या ‘कीट’साठी १५ ते १८ हजार रुपये दर मोजावा लागणार आहे.

‘कीट’ बसविणार कुठे?
स्कूटरला ‘सीएनजी कीट’ बसविल्यानंतर वाहनाच्या आकारमानत काही बदल होणार का, असा प्रश्न नागरिकांना पडू शकतो. मात्र, वाहनाचे रूप आहे, तसेच राहणार आहे. स्कूटरचे सीट व हँडल यामध्ये पाय ठेवण्याठी मोकळी जागा असते. अनेक स्कूटरला हँडलला लागूनच छोटे बास्केट किंवा डिक्की असते. त्या ठिकाणी ‘सीएनजी कीट’ बसविले जाणार आहे. त्याचा वाहन चालकाला गाडी चालवताना अडथळा येत नाही.